ORANJESTAD – Parlamentario Alan Howell, comentando riba e situacion di Venezuela, a indica cu e ta compronde cu tur hende kier un miho bida pa nan yiunan, pero no por permiti un ‘free for all’ na nos isla.
P’esey mes e ta contento cu minister di husticia y minister di transporte a firma un protocol cu aerolineanan cu ta bula entre Aruba y Venezuela, den cual ta intercambia informacion riba e nombernan di e pasaheronan cu ta bin Aruba pa pasa nan vacacion. Di e manera aki, di antemano por tin un idea ken ta personanan cu a reserva un pasashi pa bin Aruba, y por haci un miho screening prome cu e pasaheronan aki yega.
Esaki debi cu tin personanan cu ta reserva pasashi pa bin Aruba pa vacacion, y no ta regresa nan pais bek. Cu e protocol aki, lo por tin un miho bista riba cierto personanan prome cu nan yega Aruba, pa sa ken nan ta, ki intencion nan tin y si berdad nan ta bin Aruba pa pasa un dushi vacacion, of pa bishita nan ser keri.
E screening aki tambe por yuda pa wak si ta trata di personanan cu posiblemente lo por a wordo deporta den pasado, y asina por hasta preveni cu nan ta subi avion pa yega Aruba, y despues ora nan ta na inmigracion, nan wordo avisa cu nan mester bay nan pais bek.
P’esey mes, Howell a expresa den nomber di fraccion di POR, a indica cu e ta contento di mira e avancenan cu minister di husticia hunto cu minister di transporte a logra, pasobra esaki ta netamente preguntanan cu ciudadanonan ta puntra cada dia, y cu e mes a puntra den parlamento, esta ki plannan tin pa nos fronteranan ta bira mas sigur.
Mas aleu el a bisa cu pronto lo bay implementa un tipo di ESTA di Merca, cual e ta sigur lo yuda pa nos por tin un adelanto riba e personanan cu kier bin Aruba pa vacacion y tambe riba esunnan cu ta bin pa echa baina y no tin intencion di bay bek.
