Parlamentario Alan Howell ta comenta cu habitantenan di e bario di Sabana Basora a haci un peticion masal na su persona pa nan bario tambe por haya atencion. Por mira cu Howell a bin ta pidi atencion pa barionan pariba di brug haya atencion, specialmente pa loke ta trata asfalt y varios ya a bin na remarke. Habitenanan ta acudi na e parlamentario pa asina e por yuda nan pa logra loke nan a bin ta boga pa hopi aña, esta pa stop di sufri cu tur e stof y logra mira asfalt den nan bario.
Alan Howell ta satisfecho di mira cu su peticionnan ta hayando oido y asina ta yuda e habitenanan di e barionan di pariba. Awo a toca turno na un bario cu mas pa mas di 20 aña ta come stof tur dia. El a scucha e habitantenan di Sabana Basora y mesora el a pone gobierno na altura di nan deseo. “Mi ta contento pa por a pusha y logra esaki pa otro barionan. Habitantenan di Sabana Basora por conta cu mi sosten cu mi ta bay haci mi best pa esaki bira un realidad pronto. Mi tin pleno confiansa cu Minister President cu ta encarga cu Infrastructura lo haci su maximo esfuerso pa cumpli cu e deseo di habitantenan di Sabana Basora”.
