Ta conoci cu parlametario Alan Howell ta un di e personanan cu mas ta bringa na bienestar di San Nicolas y for di momento cu el a drenta Parlamento como representante di pueblo, el a bin ta lucha cu alma y curpa pa logra un miho desaroyo pa e parti pariba di nos isla.
Prome cu e pandemia a bati na nos porta por a mira cu despues cu a cera hulpestuurskantoor na San Nicolas, poniendo cu tur e habitantenan, specialmente nos grandinan, cu mester a haci uzo di e servicionan di impuesto, pago di awa y coriente, etc. brinda eynan, mester a bay te Savaneta pa haci esakinan.
Alan Howell a bringa pa habri e edificio aki bek y asina tur esunnan di San Nicolas por a acudi eynan y haci uzo di e servicionan brinda un biaha mas.
Lamentablemente, ora Covid-19 a haci su entrada na Aruba y nos isla a bay den lockdown, a cera e Hulpbestuurskantoor aki un biaha mas. Contrario na e demas oficinanan di gobierno, esaki te dia di awe no a habri mas, poniendo e peso atrobe mas riba e habitantenan di San Nicolas, specialmente nos grandinan, pa bay te Savaneta pa haci nan respondinan eynan.
Pa tal motibo, Howell ta haci un peticion na Prome Minister atrobe pa haci tur loke ta na su alcance pa habri e servicionan di Hulpbestuurskantoor na San Nicolas. “Nos hendenan di pariba no por wordo laga atras, nan tambe merece di conta cu servicionan di gobierno den nan districto. Hulpbestuurskantoor San Nicolas mester habri back no mas tarda cu fin di februari”, Alan Howell a expresa.
