Durante tratamento di presupuesto supletorio den reunion publico den Parlamento, Alan Howell cu costen di coalicion a presenta un mocion na bienestar di esunnan cu ta cobra onderstand/bijstand. Siman pasa el a anuncia caba cu el lo bay enfoca riba e grupo di ciudadanonan humilde aki pa por facilita un tiki nan situacion, y den e caso aki ora di cobra.
Intencion di e mocion aki ta pa esunnan cu ta cobra onderstand/bijstand por cobra esaki entrante 1 di februari 2021 via transferencia bancario, evitando asina cu nan mester para den rij largo bou solo cayente of den algun caso, bou awa.
E mocion ta bisa:
CONSIDERANDO: Cu ta inhumano pa laga hendenan para den rij pa cobra onderstand/bijstand bou solo cayente y awasero; Cu na e momentonan aki aglomeracion di hende ta peligroso debi na posibel contagio di Covid-19; Cu tecnologia ultimo añanan a avansa masha hopi mes y no tin necesidad pa para den rij largo mas; Cu nos hendenan humilde merece un trato husto; Cu nos islanan ruman a adapta e pago di ondestand/bijstand pa algun tempo atras caba pa wordo paga na nan banco preferi; Cu ta spaar tempo na momento cu haci transferencia bancario; Cu nos hendenan humilde por lanta nan placa via bancomatico na un manera mas facil y rapido; Cu esaki ta un deseo cu ta biba bou esunnan cu ta cobra onderstand/bijstand.
TA DICIDI: Di urgi gobierno pa haci e cambionan necesario mas pronto posibel pa tur esunnan cu ta cobra onderstand/bijstand por haya nan placa via transferencia bancario entrante 1 di februari 2021.
Alan Howell a entrega e mocion den nomber di tur cobrado di onderstand/bijstand y a gradici coalicion pa sostene esaki y tambe Minister di Asuntonan Social, Glembert Croes cu a bisa caba cu por conta cu e sosten aki.
E ta spera cu na momento di votacion e por conta cu e sosten tambe di esunnan den oposicion, esta fraccion di AVP y e parlamentario independiente.
