Parlamentario Alan Howell durante reunion publico den Parlamento siman pasa unda cu ministernan di Gabinete Wever Croes a presenta e situacion den e prome 6 lunanan di 2019 di cada ministerio, a haci un serie di pregunta na e mandatarionan.
El a pidi informacion na Minister di Enseñansa riba e trailer di Traimerdia cu a kima na San Nicolas y a puntra si ya caba tin un solucion pe.
Tambe el a haci pregunta na Minster Dangui Oduber riba e lotto nobo y tambe ki plannan e tin como Minister di Deporte pa den corto plaso drecha e tereno unda e muchanan ta practica e deporte di BMX. El a pidi e mandatario pa por fabor drecha e cancha di basketball na Village mas pronto cu ta posibel.
Preguntanan pa Minister di Infrastructura tabata relaciona cu e construccion di e hotel na San Nicolas. El a puntra ki dia lo pone e prome piedra y a puntr’e kico esaki kiermen pa San Nicolas economicamente. A puntr’e tambe riba e proyecto di waste to energy di Serlimar, riba viviendanan na San Nicolas y con ta bay sigui cu e proceso di asfaltamento di careteranan rond di Aruba y specialmente na San Nicolas.
Preguntanan pa Prome Minister tabata con ta bayendo cu e renobacion di edificio di Bestuurkantoor na San Nicolas y basa riba peticionnan di personanan di pariba di brug a puntra riba e posibilidad di por haya servicio di paspoort y ID na San Nicolas mes.
Howell a puntra Minister di Husticia kico ta e cambionan cu minister a haci pa preveni cu presonan lo por sigui scapa for di KIA. Tambe a puntra pa cifranan di con hopi e cantidad di ilegalnan cu ta subi tera a baha y con hopi e cantidad di atraconan a baha.
Na Minister di Transporte el a puntra cuanto bus nobo mas falta pa yega, mirando cu siman pasa ya caba algun a yega Aruba. Tambe ki dia e busnan nobo lo ta riba caminda publico. Finalisando, Alan Howell a puntra e minister riba e status di e fast ferry y San Nicolas Port Authority.
E siman aki e reunion publico lo continua y lo tin mas claridad riba e diferente preguntanan realisa.
