Un parti di sanidad publico cu nos no a toca den nos editorial recien riba e metanan di desaroyo sostenibel y esey ta e maneho di desperdicio. Pero e tema no a tarda pa bin dilanti atrobe: den e dianan aki sin biento, e sufrimento di e barionan den vecindario di e dump ta bira insoportabel atrobe. Mientras cu gobierno ta gaba cu nan ta yegando e punto mas halto di e brug na Spaans Lagoen, nos mester puntra nos mes con halto e cero na Parkietenbos lo mester bira prome cu di berdad bin accion pa resolve e problema aki “de una vez por todas”.
Tempo cu e gabinete aki a haci su entrada den gobernacion, tabata bisto cu nan ta bay pa para y desmantela e proyecto di converti desperdicio den ‘fluff’. No ta bay pa discuti aki ampliamente e bentaha y desbentahanan di e proyecto ey; esey ta un storia riba su mes. Den transcurso di henter e proyecto ey, tambe ora cu e gabinete aki a hereda esaki, e composicion di e desperdicionan acumula tabata y lo sigui ta un problema. Un monton grandi di tur tipo di desperdicio bruha, di sushi di cas te na tur sorto di obheto di metal, di glas, frishider, stoof, resto di material di construccion, verf, etc. Kico tabata e respuesta? Recientemente hues a duna su veredicto final den e caso entre gobierno y e compania operador di e proyecto di fluff: por bisa cu e compania a gana e caso pasobra a sali na cla cu a ‘mismanage’ e proyecto, deliberadamente o no, pero en todo caso gobierno no por a responsabilisa e compania pa e fracaso y mester a paga loke tabata debe ainda.
Pero kico tabata e alternativa den henter e problematica aki? Un compania cu por conta cu simpatia di e gobierno nobo a cuminsa cu un proyecto na otro banda di caminda. E proyecto nobo ta basa riba otro tecnologia, cual ta e procesamento di desperdicio convertiendo esaki (parcialmente) den gas, cu por uza na WEB como combustibel en bes di heavy fuel oil. Banda di deshaci asina di desperdicio, ta facilita WEB uza menos fuel oil loke ta bon pa medio ambiente y ademas faborabel si WEB bay uza gas natural, di nos mes o cumpra di otro, como combustibel en bes di fuel oil. Nos tur ta sali gana, toch? ‘Nope’, pasobra nos ta papiando october 2016, casi november, y no tin ningun noticia di e proyecto di gas cu ta para pa basta tempo caba, mientras cu ningun hende no ta dunando claridad riba e asunto.
Mientras tanto, e monton di Parkietenbos a bira un cero, cu si nos no tene cuidao un di dianan aki ta derumba cay den lama, anto e ora nos tin un problema mas grandi ainda! Lo bin probablemente un prohibicion pa turista y local no drenta lama mas na e costa, cu ta duna mayoria di nos pan riba mesa? Unda e famoso ministro a keda cu ta cla pa bay guera cu tur hende y tur cos cu ta menasa turismo, inclusive e integrantenan di e sector mes? Mientras cu e ta hibando un guera tambe cu esnan cu kier salvaguardia reserva forestal di mangel na Pos Chikito pasobra ‘cueste lo que cueste’ mester bin un hotel den e area ey, e no ta comenta riba e problema ambiental enorme cu e situacion na Parkietenbos ta representa. Di otro banda nos no por tum’e na malo, pasobra di su coleganan cu ta directamente responsabel pa e asunto aki, nos no ta tende absolutamente nada. Y pakico no? Simpel, nan ta ocupa cu loke nan ta mira como prioridad, y esey ta e proyectonan di prestigio cu ta hinca nos mas den problema financiero ainda, mientras e problemanan berdadero ta keda benta un banda. Den e caso aki nan no por culpa oposicion, pasobra nan tin shete aña den e ‘driver’s seat’, anto bo no a logra nada? Es mas, bo a gaña ‘resolve’ e problema habriendo man y cera wowo pa e hecho cu rond di Aruba un monton di dump ilegal a surgi, mas di cincuenta mientras tanto, unda diferente compania ta bay benta desperdicio cu no por bay Parkietenbos mas.
E pregunta grandi cu ta surgi ta esaki: dia cu nos haya un gobierno drechi, cu si ta bay atende e problemanan grandi aki, nos lo ta contento, pero di unda nan ta bay saca placa pa realisa tur e cosnan aki cu berdaderamente ta necesario? Di unda, si tur loke ta di fia, a fia caba pa un cantidad di proyecto di prestigio innecesario, te un debe total di cinco mil miyon florin pa nos paga den e proximo decadanan! Kico nos Prome Ministro y su Kroonprins kier bay bisa e habitantenan di e barionan afecta awor, cu no tin solucion y cu miho cos nan haci ta bende nan cas y bay biba otro caminda? Nos sa cu e gobierno aki ta insisti den crea pantaya bunita pa sconde e cosnan mahos nan tras, pero cada biaha nos ta topa cu nan atrobe. Hasta cuando.
