Dump (2).jpg

Entrante 1 Januari 2017  lo stop di hiba sushedad  dump y e kimamento lo wordo para, esaki ta locual prome minister Mike Eman a bisa e miembronan di fundacion Parkietenbos.

Oferta:

Despues di a reuni cu habitantenan, gobierno a anuncia cu desde 1 di Januari lo stop di manda sushi, specialmente di cas, pa dump na Parkietenbos. Sushi lo bay pa Ecogas, cu cu e intencion pa kima, gasifica y manda via pipa pa WEB traha coriente cune of empaketa e sushi aki y mand’e afo. E habitantenan di e area a manifesta y pidi pa e dump wordo cera, mirando e molester cu nan ta haya dia aden dia afo di e dump, particularmente di kimamento ilegal cu ta tuma lugar y muskitanan cu ta azota e bario.

Protesta di trahadonan:

Mientras tanto trahadonan di Selimar no ta mucho contento cu e decision aki y cu nan no a wordo informa riba e desaroyo aki. Nan tin varios preocupacion y entre nan tin un nivel halto den e compania aki. Vocero di Serlimar riba su propio wall di facebook a indica cu e ta spera mas informashon concreto referente futuro di Parkietenbos. “Esaki ta mi anuncio como empleado y no como relacionista publico di Serlimar”, asina ela duna di conoce. Tambe oposicion a tuma e topico aki y a cuminsa emiti comunicado riba rednan social. Parlamentario Xiomara Ruiz-Maduro ta bisa cu gobierno a sabotea e proyecto di dump pa 7 aña largo pa asina e por entrega Metacorp e sushi di Serlimar. “Ela laga e dump bay for di man y activa su sostendornan den un stichting pa yude hiba su plan acabo. No tin destaho publico. No tin claridad y ningun investigacion haci riba e holor malo cu ta sali di e compania di su sponser. E no a informa Parlamento di su plan siendo cu nos di MEP a entrega un mocion cu a wordo aproba unanimamente pa dentro di un luna Eman bisa Parlamento kiko su plan ta y pa den esaki e splica tambe kiko lo pasa cu e trahadornan di Serlimar. Eman no a informa Parlamento y a bay prensa cuminsa papia y trece panico.”