Ayera a continua e tratamento di presupuesto di aña 2023 na Parlamento di Aruba, cu a conta cu presencia di Minister di Transporte, Integridad, Naturalesa y Asuntonan di Adulto Mayor, Ursell Arends, kende a contesta diferente pregunta cu parlamentarionan tanto di partido MEP como di Raiz a haci.

Den e serie di preguntanan aki, minister Arends a trece dilanti e palabra integridad cu tanto ta wordo menciona den dianan aki. Pa cu esaki, el a indica cu como politiconan nan tur tin cu para keto y mira con esey ta afecta cada un di nan den bista di e comunidad.

A bin dilanti e pregunta di kico su persona ta haciendo tocante integridad.

El a elabora riba loke ta e Corporate Governance Code, e legislacion cu tambe a wordo presenta den congreso consultativo di dia 3 y 4 di november, cu pa prome biaha nan a habri un concepto di ley (Landsverordening Corporate Governance y concept Code Corporate Governance) pa duna espacio pa tur e instancia cu mester atende y traha cu e ley aki pa nan duna nan imput y cu e ley aki cuminsa cana su caminda. Di e feedback cu nan a haya, minister Arends a sigura cu nan tin tres siman pa entrega e feedback, dus cada un di e instancianan aki cu ta cerca di 80, cu ta hopi mas profesional y hasta studiantenan di universidad di Aruba a participa den Congreso Consultativo.

E concepto di ley tin tres siman aworaki pa haya e feedback y unabes haya esey, nan lo bay procesa esey hunto cu comision di Corporate Governance, Themis Institute y wetgeving jurist cu ta trahando riba esaki pa e ley aki por wordo manda na Directie Wetgeving en Juridische Zaken (DWZ) y cuminsa cana su caminda for di formal pa e por yega na Raad van Advies y despues Parlamento di Aruba.

“E concepto a wordo manda pa parlamento tambe y esaki no kiermen cu de facto parlamento di acuerdo cune pero boso tambe como parlamentario por haci uso di e oportunidad di awor caba pa revisa esaki y ripara si tin algun cambionan cu boso kier mira den e ley.

Di Bureau Integriteit Aruba el a menciona cu e personal a wordo aumenta di dos pa cuatro, e deseo ta pa den lunanan dilanti pa seis pa asina ey nan por haci tur e tarea cu e bureau aki kier haci di berdad.”Esaki ta garantisa un persona den aparato publico cu mira algo cu no ta bayendo bon y cu ta carece di loke ta trata integridad, e tin e proteccion tambe ora e kier trece esaki dilanti”.

Parkietenbos tin cu cera 31 di december

Pa loke ta e topico di Parkietenbos cu segun informacion mester cera dia 31 di december, a puntra na minister Arends si Carentra na e momentonan aki tin ekipo pa procesa taira, el a splica cu primeramente Ecotech ta ricibi e tairanan, nan ta saca e hero for di e tairanan ey, e hero ta wordo manda pa Daltra y despues e mesun empresa aki ta exporta e hero.

Pa loke ta trata e taira mes, Ecotech ta shred esaki y e tairanan mas chikito ta wordo manda pa Carentra unda eynan ta haci uso di pyrolysis y ta procesa e tairanan aki pa yega na un azeta y tambe ta saca e carbon preto cu lo wordo exporta.

“E azeta ta bay wordo usa pa reduci e cantidad di Heavy fuel oil (HFO) cu Aruba ta bezig ta importa pa draai e turbinanan na WEB Aruba N.V, “esaki ta palabracionnan avansa cu ta tumando luga tanto cu FMSA y Carentra y di e forma aki nos ta cera e circulo pa yega na un economia circular y esaki ta un ehempel perfecto di un di e productonan nan, asina ki nos ta trahando riba otro waste streams pa asina nos cera e loop pa yega na un economia circular”, el a señala.

Aruparking mester wordo introduci di un forma cu e no ta bay crea disgusto pa comunidad

Manera por a mira riba rednan social, tin basta rabiamento di parti di algun chauffeurnan den comunidad cu den ultimo dianan despues cu Aruparking a wordo ‘activa’ bek nan a haya stickernan pega den nan auto, specificamente riba e bentana di e chauffeur unda cu nan a sigura cu esaki ta causa un disgusto pa via di e luga precies unda e sticker a wordo pega causando un impacto.

Di esaki, minister Arends a comenta cu “cada persona cu ta haya un sticker, ta pasobra e no ta den cumplimento di ley, den esey tambe nos tin cu para keto y si bo ta cumpli cu e reglanan cu tin, bo no lo haya sticker, esaki ta algo cu nos como ciudadano tambe, mester asumi cu nos responsabilidad y cumpli cu e reglanan cu tin vigente pa evita di haya un, dos , tres of cuatro biaha un sticker”.

Den su opinion, e ta di acuerdo si cu e pensamento cu Aruparking mester wordo introduci di un forma cu e no ta bay pa crea disgusto of antagonisa e ciudadanonan “den esey mi ta completamente di acuerdo y nos lo traha conhuntamente cu e raad van toezicht y cu gerencia di Arubus pa introduci Aruparking di un forma cu e ta un bon forma social y cu di berdad e ta crea e regulacion, organisacion, accesibilidad y tambe e mobilidad cu di berdad nos kier mira den centro di e ciudad”.