Ora bo bay para auto den centro di ciudad of den cercania, yama awor e zona di Aruparking, chens ta grandi cu bo ta mira varios auto cu klem pa para den vak robes of pa motibo cu no a para den un vak. Realidad ta, cu si bo tin mala suerte, e auto cu para malo banda di bo no ta haya e klem y abo si. Si bo auto wordo geklem bo ta wordo laga na pia pa cana bay Aruparking pa paga 75 florin pa kita esaki.
Ni maske cuanto borchi wordo poni pa adverti automobilistanan segun Aruparking, falta mas borchi. Esaki ta basa riba informacion colecta pa reporteronan di Bon Dia Aruba den un recorido rond di Oranjestad. Antes berdad e comunidad tabatin mal custumber di para na rand di tur caminda, un custumber cu ainda no a kita y cu Aruparking ta tratando di corigi. Algun sitio popular pa para manera ta e caso ta banda di lagun, a haya borchi cu ta indica cu ta touw auto den e zona aki. O sea no ta sigui e paso di pone klem y despues di tres ora ta touw e auto. Otro areanan cu no tin acera, no tin vak geel ni blanco, ta duna bo e beneficio di duda cu bo por para canto di e caminda manera a custuma di haci pa hopi aña. Specialmente ora cu no tin borchi pa indica cu bo no por haci esaki y na mes momento ta mira mas auto eynan. Djis pa bo yega na bo auto y haya un klem poni na dje.
Un caso specifico cu a yega na atencion di nos matutino ta enfoca riba e caya net banda di Burger King den caya grandi. Un ciudadano a haya su mes den un situacion hopi fastioso ora cu a klem unicamente su auto na e sitio. Realidad ta cu na momento cu e auto a wordo geklem no sa si tabatin mas auto para eynan manera ora cu el a yega parkeer, sinembargo despues cu e ta warda na su auto mas auto a parkeer eynan.
E ciudadano confundi a puntra pa un splicacion pakico su auto a wordo geklem y a haya contesta di cu esaki ta e zona di Aruparking y un splicacion di e ley cu a bin na vigor. E ciudadano no a keda satisfecho cu e contesta di esunnan cu a atende na Aruparking mirando cu no tin niun caminda ta menciona cu e no tabata tin mag di para na e sitio. Bon Dia Aruba a purba tuma contacto cu funcionarionan di Aruparking pa haya sa con e situacion di klem auto ta bayendo y specificamente a base di kico ta klem un rij di auto para malo. Sinembargo no a haya contacto e contacto.
Informacion cu nos a logra haya ta cu tin 12 parkeerwachter kende nan ta haya diferente area pa controla, segun nan mira algo robes nan ta raporta esaki na otro colega cu tin e auto “klem mobiel”. Segun articulo publica na october di NoticiaCla.com Aruparking a busca 50 klem. Den transcurso di tempo algun a wordo kibra cu por a wordo drecha y otronan no. P’esey no ta cla cuanto tin den funcion actualmente. Echo ta cu e auto ta wordo geklem bou di tarea di e parkeerwachter, esey kiermen cu otro autonan por keda sin haya klem tambe. E pregunta ta keda e ora ken ta controla esaki mirando cu cada klem ta costa 75 florin pa e persona haya esaki kita for di su auto.
E ta genera un cantidad lucrativo na final di dia. Coriendo 5 minuut ayera mainta nos matutino a mira 3 auto cu klem den un area relativamente cerca di otro. Manera splica anterior e suma di multa ta keda subi tambe, un auto geklem ta 75 florin pero despues di tres ora nan ta touw esaki cu ta costa 150 florin, haciendo e total 225 florin. Tambe pa cada dia cu un auto keda den garashi di Arubus e ta costa 25 florin. Aruparking a nace pa genera fondo pa Arubus, e pregunta ta si esaki mester sosode a costo di poco clientenan cu centro di ciudad a resta.
