E intencion ta pa medio maart, extende e proyecto di parkeermeter pa e zona hotelero na Palm Beach. Asina e mandatario encarga cu transporte Otmar Oduber a bisa durante e contestacion di pregunta den Parlamento dialuna, segun Noticiacla. Mes momento a nota cu tin varios asunto ‘habri ainda’ prome cu por sigura e comienso di e di ‘dos fase’ di e proyecto. Entre nan, ainda tin cu sigura terenonan pa parkeer pa trahadonan, y mas otro asunto prome cu implementa e proyecto. A sigura cu unabes cu e implementacion cuminsa, por spera un extra entrada di entre 1 pa 1.2 miyon florin extra.
Den di dos siman di januari, e compania a bisa cu tur cos tabata mustra cu pa 1 di maart proximo, e area di hotel lo conoce un total di 383 vak di parkeer pa cual clientenan mester paga. Segun vocero di Aruparking Sanin Daou, tin cu determina exactamente cuanto espacio lo mester wordo marca geel tambe. Actualmente ta deliberando y marcando e areanan geel, ya cu e otronan regular ta cla caba, segun Daou. Asina cu tur cos ta cla, lo bin afo cu e informacion di cuanto espacio exacto lo ta disponibel pa e area hotelero.
