Den nos edicion di ayera, a wordo publica cu Parke Nacional Arikok lo ta interesa di wak con e proyecto di construccion di un hotel na Isla di Oro lo forma. Bon Dia Aruba kier a rectifica esaki mirando cu sra. Tatiana Becker no tabata papiando pa Parke Nacional Arikok.
Sra.Tatiana Becker tabata presente na e presentacion di e proyecto na Isla di Oro como un independiente haciendo un parti di e estudionan ambiental bao di su propio compania di consultacion. Sr. Greg Peterson di Aruba Birdlife Conservation y tambe miembro di e board di Parke Nacional Arikok, ta confirma na Bon Dia Aruba cu eigenlijk Parke no ta na fabor di e proyecto aki. Sr. Peterson ta bisa: ”Mi a papia cu e director di Parke anto nan no ta na fabor mes cu e proyecto aki. Nos no kier sinta cu nan (desaroyadornan) mes, nos no kier nan construi nada. Nos a papia cu gobernador, parlamento y gobierno. Parke no kier ningun desaroyo di hotel den e area di Isla di Oro cual ta un di e 16 areanan destina pa keda protegi y bira parti di Parke Nacional.”
Segun sr. Peterson, e Parke conhuntamente cu 5 NGO’s no ta na fabor di e proyecto aki.
E cinco NGO’s ta: Aruba Marine Mammal Foundation, Turtugaruba, Reefcare Foundation, Aruba Marine Park Foundation y Aruba Birdlife Conservation. Sin laga afo 11.000 firma di hende cu ta contra e proyecto aki. ”Nos tin un parlamento cu a vota pa protege e area aki y nos ta sinti cu e gobernador ni gobierno tambe no ta na fabor di e proyecto aki. Nan (desaroyadornan) ta keda haci manera si ta ami so ta contra,” sr. Peterson ta splica.
Resultadonan ambiental
Sra. Tatiana Becker ta bisa Bon Dia Aruba cu el a ripara algun fout den diferente publicacion cu ta ”haci parce cu e resultadonan di e estudionan ambiental ta cla caba.” Sra. Becker ta bisa cu e resultadonan cu nan a presenta tabata ‘resultadonan inicial.’ Sra. Becker ta bisa: ” Ora tur e resultadonan ta definitivo, e Environmental Impact Assesment lo wordo entrega.”
Aruba Birdlife Conservation ta reta Zoetry Isla di Oro Aruba
Aruba Birdlife Conservation a publica un reaccion algun siman atras en cuanto e asunto aki.
Akinan por lesa e declaracion completo di ABC:
E desaroyador di proyecto Zoetry Isla di Oro den un comunicado diprensa Dialuna den e corant Bon Dia, a publica cu nan proyecto ta wordo sosteni pa comunidad di Aruba y pa tur NGO.
Den un comunicado di prensa Aruba Birdlife Conservation (ABC) a indica cu nan a logra haya mas di 10.000 firma cu ta mustra lo contrario di locual Zoetry Isla di Oro ta bisa.
Banda di esaki ABC tin prueba di 5 NGO, cu for di April 2016 ta opone nan mes contra e proyecto y a duna esaki di conoce na e desaroyador y na Gobierno di Aruba.
Den e comunicado di prensa di e desaroyador, e ta bisa cu e ta completamente transparente cu tur hende y cu e proyecto lo no causa daño na e mangelnan (mangrove).
Al contrario, e desaroyador ta bisa cu e proyecto lo salba y proteha e mangelnan na Savaneta.
Na Februari di 2013 Parlamento di Aruba na un manera unanime a vota pa proteha e mangelnan y pa nan wordo declara como parti di Parke Nacional Arikok.
Segun ABC, e proyecto di Isla di Oro no ta cuadra cu e deseonan die instituto mas halto di Aruba su democracia. Pesey Aruba Birdlife Conservation ta reta e desaroyador Zoetry Isladi Oro Aruba pa publica nan diseño final di e proyecto, pa asina diberdad tin transparencia pa pueblo di Aruba. Na e manera aki e desaroyadornan por haya un oportunidad real pa comproba cu nan lo no mishi cu e mangelnan. ABC ta reta e desaroyadornan tambe pa publica e rapport completo di e estudio riba e impacto riba medio ambiente (Environmental Impact Assessment Study), pa loke ta nan proyecto.
