Ayera presidente di organisacion ambiental Aruba Birdlife Conservation (ABC) mester a bolbe bati alarma riba rednan social apelando na comunidad pa mas informacion riba algun destruccion aparentemente tumando luga na Mangel Halto.
ABC a wordo informa riba daño intencional y structural pa locual ta e mangelnan na Mangel Halto su area di naturalesa. ABC a wordo informa cu canoe nan a wordo mira ta elimina mangelnan pa por crea un tipo di entrada unda barconan por pasa. E organisacion ambiental a bati alarma riba rednan social apelando na comunidad si tin cualkier informacion pa por fabor informa nan riba esaki. Naturalmente mesora a surgi un ola di reaccion di hendenan riba e noticia aki, unda cu algun a subraya cu a yega ora pa cuminsa cu campaña di conscientisacion pisa riba proteccion di Aruba su naturalesa. For di scol preparatorio te cu adulto, incluyendo tur compania/organisacion/individuo cu directamente of indirectamente tin di haber cu nos sector turistico; ‘den otro palabra, henter nos comunidad,’ tabata expresion di un ciudadano.
Investigacion di DNM
Nos a purba tuma contacto cu director di DOW Marlon Croes, pone na altura di e noticia aki pero no a haya ningun reaccion ainda. E informacion cu nos a ricibi for di e consehero di e ministerio di Infrastructura ta indica cu Parke Nacional Arikok a entrega keho tocante loke ta pasando na Mangel Halto. Tambe Departamento di Naturalesa y Medio Ambiente su director lo ta haciendo investigacion pa loke ta tumando luga. “E team di inspeccion di DNM ta na altura anto a manda nan team di inspeccion pa documenta locual ta tumando luga,” ta loke nos a tende for di consehero di ministerio di Infrastructura. Bon Dia lo sigui e desaroyonan aki y trece mas informacion manera cu esaki ta disponibel.
Areanan proteha di naturalesa
Presidente Greg Peterson di ABC, cu tambe ta presidente di directiva di Parke Arikok, a haci un suplica pa gobierno aña pasa pa no lubida riba promesa pa traspasa e otro areanan di naturalesa pa Arikok. Pa asina por proteha nan. Gobierno anterior y Arikok a firma un acuerdo di principio pa mas pronto posibel e areanan lo cay bou e parke. Na april 2017 caba e area di Spaans Lagoen a wordo traspasa y ainda tin 15 area pendiente. No por lubida tambe e traspaso di Spaans Lagoen cu a sosode durante e bishita di prinses Beatrix. E tempo ey sr. Peterson a bisa den un entrevista cu Bon Dia Aruba cu e gobierno anterior su ‘vision green no a haci Aruba mas berde’. “Nan vision ta uno bunita, pero e ta enfoca riba energia sostenibel. Nos como NGO ta yama e vision ey shinishi, no berde.” Sinembargo te awe e 15 area no ta inclui den e parke y no ta cla tampoco con lihe tur esaki por cuminsa sosode.
Ley ambiental
E motibo pakico ainda tur e otro areanan di naturalesa cu mester keda protegi no ta protegi ainda, ta pasobra esaki djis no a keda implementa. Marisol Lopez-Tromp (POR) tabata presidente di parlamento pa algun aña unda cu a bay den reunionnan y por a wak cua ta e leynan cu e ministernan ta duna prioridad na dje. Esakinan ta encera reunionnan cu gruponan manera Financia, Gabinete di gobernador, Directie Wetgeving, representante di ministernan. El a bisa nos aña pasa den un entrevista riba e tema aki cu: “Nunca den e tres aña cu mi tabata presidente di parlamento, e ley ambiental tabata tin un prome prioridad. Locual si a haya prioridad por ehempel ta ley di Citgo cu mester a pasa riba tur. Pero no esun ambiental cu no ta dificil; bay di acuerdo cu e mocion di e 16 areanan, traha un decision (landsbesluit) pe y laga e departamento implement’e.” Sra. Lopez-Tromp a conclui: “Bo kier bisa mi cu den cuater aña bo no por a haci e cos ey? Pakico? Pasobra no tabata tin e disponibilidad di aproba esakinan. Pasobra lo en berdad limita cualkier gobernante pa otorga pa loco.”
