Fundacion Parke Nacional Aruba (FNPA) a publica un comunicado recientemente riba rednan social, pa trece dilanti su preocupacion tocante un evento di ‘Off Road’ cu lo tuma luga cada fin di aña den oranan di marduga di forma clandestino.
Parke Nacional Aruba a splica cu esaki ta di 11 edicion cu un grupo denomina ‘I Love Conchi (ILC)’ ta organisa e evento aki. Nan ta causa hopi destruccion y vandalismo den un area natural cu ta protegi y cu ta pertenece pa Parke Nacional Arikok.
Bon Dia Aruba a combersa cu Carl Quandt, PR di Parke Nacional Aruba y el a trece dilanti cu ultimo añanan di e evenemento aki, nan ta cambia e fecha di tal forma cu FPNA no sa ki dia nan ta drenta. Nan ta haci e evento di manera clandestino. El a bisa cu e aña aki, e fundacion a reforsa e entradanan di parke y a elimina e entrada di Shete desde 1 di april. Tambe nan a traha pa cera e otro entradanan ilegal cu tabatin.
Asina mes, el a comenta cu di nan banda, nan a purba di traha henter aña pa wak pa e evento no tuma luga; pero esaki ta un empuhe di nan banda pa asina duna un señal pa e grupo aki no drenta den parke den orarionan cu no ta di operacion.
Igualmente, Quandt a manifesta cu usualmente e grupo en cuestion ta drenta den parke via diferente entrada y e parti cu nan ta bishita ta conchi, cu tur sorto di vehiculo 4×4, sin tuma den consideracion e area natural y protegi.
Pa preveni ocupacion indesea door di ILC den areanan protegi, nan a pidi colaboracion di Cuerpo Policial di Aruba y a cuminsa prepara pasonan huridico. No obstante, teniendo na cuenta e persistencia resoluto di e grupo aki, pa impone nan kier den Parke Arikok, FPNA ta sigui vigila y lo tuma tur medida necesario pa nenga entrada no autorisa den Parke Nacional Arikok. Ademas nan ta adverti organisado y participante cu FPNA lo persigui cada violado di reglanan di Parke Arikok te na unda ley ta prescribi.
Na organisado y participante di ILC, FPNA ta haci un apelacion fuerte pa stop cu e evenemento peligroso y destructivo aki den areanan natural protegi di Aruba. Na conciudadano cu sa di hende cu tin pensa di participa den ILC, nan ta pidi pa haci un esfuerso pa descurasha esaki.
