E interes principal ta naturalesa y esey ta locual ta e tarea di Fundacion Parke Nacional Aruba Esey tabata e argumento principal di abogado mr Suhaila Arendsz Marchena representante di FPNA den e caso cu Aruba Offroad Foundation a entama siman pasa.

Manera ta conoci, doñonan di companianan cu ta bende tour cu vehiculonan offroad, esta ATV y UTV a haya notificacion cu FPNA a limita nan actividad den e areanan natural, particularmente Parke Nacional Arikok. E companianan a organisa nan mes den Aruba Offroad Foundation, y a entama un caso contra FPNA y Pais Aruba. E argumento cu nan a hiba ta cu FPNA ta asumi autoridad cu e no tin, y cu e Minister di Medio Ambiente no tin e autoridad pa limita trafico mirando cu e no tin autoridad pa limita uzo di caminda publico.

Tratado

Abogado Arendsz Marchena a ilustra cu FPNA ta mara no solamente na leynan local, pero cu Aruba como parti di Reino ta mara na tratadonan internacional dirigi na proteccion di naturalesa. E ley Natuurbescherming ta base di realisacion di e maneho di naturalesa. Parke Nacional Arikok ta un di e areanan natural mas importante cu tres di e formacionnan geologico mas importante y ta rico na biodiversidad. Ademas, e ta e unico parti di Aruba unda no a kibra den e flora y fauna. Asina tambe a duna e parke un status di proteccion. Ta ley mes ta exigi di FPNA pa percura cu ta hiba un maneho cu no solamente ta limita daño na e rikesanan natural y geologico, y sigur evita cu actividadnan ta causa morto di flora y fauna.

Scala di investigacion

Ta a base di investigacion cientifico riba comportacion dañino ta bin cu regla kico ta permiti of no. Y e maneho ta sosteni pa e Plan di Ordenanza Teritorial, ROP y e rekisitonan manera na e plan aki, esta e ROPV. E argumento di e fundacion ta cu e reglanan nobo y ahustacionnan di FPNA pa elimina uzo di ATV y UTV ta basa riba investigacion deficiente. Arendsz Marchena a bisa cu los di e analisis haci pa FPNA mes, tin un cantidad di estudio internacional cu ta mustra riba e impacto negativo di e vehiculonan UTV/ATV tin riba naturalesa. Pero FPNA lo keda habri pa desaroyonan cientifico y conseho, y si ta necesario lo adapta su maneho. Pero te ainda no tin indicacion pa cambio, e abogado a bisa huez.

Stof

Arendsz Marchena a bisa cu e cantidad di stof fini cu e UTV/ ATVnan ta ocasiona ta daña vegetacion. Y por compara esakinan cu e vegetacion cu no ta constantemente exponi na e tipo di stof aki cu tournan constante di ATV/UTV ta produci. E tipo di stof fini aki no ta laba cu yobida, al contrario. Nan ta forma un capa di lodo cu ta degenera e calidad di e mata. E erosion di e tournan ta enorme y vehiculonan ta crea buraco cu ta cambia e patronchinan hydrologico cu ta resulta den degradacion di e medio ambiente. Los di e hecho cu ta trapa hopi animal, e zonido y movecion di tera ta forsa hopi animal pa bandona nan habitat. Locual FPNA a ripara cu den e periodo cu e parke tabata cera, cu hopi di e animalnan a bolbe nan habitat regular. FPNA a documenta ademas,

Riba dje, e tournan UTV/ATV ta stroba esnan cu kier gosa di trankilidad di parke, y ta e causante di mas accidente. Tin prueba pa mustra con ta destrui vegetacion y infrastructura di Parke Nacional Arikok. Rangernan hopi biaha pa hala atencion di e operadonan di tour, pero sin resultado.

Caminda publico

Pa loke ta e regla di trafico, aki tin un interpretacion diferente di e ley. Segun Arendsz Marchena, e ley ta papia cu e caminda mester ta accesibel pa tur trafico, pero esey no ta nifica cu e ta uno publico. Es mas, FPNA tin autoridad pa pone su mesun borchinan, y hasta ta cobra si kier uza e caminda. “Ley netamente ta bisa cu e camindanan den parke no ta publico. No solamente FPNA por regla e uzo cu su mesun borchinan, pero tambe tin autoridad pa duna e camindanan nan nomber, contrario na camindanan publico, cu ta cay bou tarea di Gobierno. E unico caminda semi-publico ta e caminda principal di San Fuego pa Vader Piet.” Riba dje, FPNA ta co-responsabel pa mantencion di e camindanan. E hecho cu UTV/ATV ta permiti riba caminda publico di Aruba, pues no ta nifica cu nan ta permiti riba e camindanan di FPNA. Ademas, e ley di proteccion di naturalesa ta pisa mas cu e ley di trafico, y ehempel ta e boet pa core den duinen cu tambe ta protegi.

FPNA ta rechasa e acusacion cu ta actua contra bon maneho y contra ley, particularmente ley di trafico. Segun e fundacion Offroad Aruba, FPNA lo no a tene cuenta cu un balance y obligacion di tene cuenta cu e companianan cu ta partido den e parke. Mas ainda, e fundacion lo no a spera e reglanan nobo cu tin consequencianan enorme, pues no por a prepara pa nan. Y pa sostene nan ponencia, e fundacion ta uza un propaganda di Aruba Tourism Authority unda a nombra UTV y ATV como parti di e transporte disponibel na Aruba. Pero FPNA a reuni cu e grupo, y pa tal motibo mes a institui un periodo di transicion. Di otro banda, tin urgencia pa pone un paro immediato na e dañonan cu ta haci na naturalesa. Directie Natuur & Millieu tambe a informa e grupo cu den luz di ROP y ROPV nobo, cu e actividad di ATV/UTV ta dañino pa naturalesa.

Impacto economico

Pa loke ta e impacto economico, administracion di FPNA ta mustra cu tin como 100 ATV/UTV pa dia cu ta uza e mesun area henter dia. E daño ta grandi. A puntra cuanto reservacion tin te cu 2022 manera e companianan mes a bisa, y a nenga di duna FPNA esaki. “Nan lo no kier comparti informacion delicado cu FPNA. Pero for di administracion por saca afo cuanto entrada e operadonan a cumpra. Pues no tin informacion delicado.” E argumento cu FPNA ta stroba e companianan di gana nan placa tampoco ta cuadra, mirando cu Fundacion Offroad Aruba mes a indica cu mayoria cliente ta di cruceronan y cu mayoria di nan tour ta pafo di parke. “Aruba ta cera ainda pa crucero y algun compania tin jeep cu nan por uza pa bishita Parke Nacional Arikok.” Y FPNA nunca a constata cu jeepnan grandi cu 14 hende ta baha for di caminda y ta tuma rutanan cu ta forma risico grandi pa e pasaheronan.

Arendsz Marchena ta haya tambe cu companianan tin responsabilidad propio pa investiga si nan actividadnan ta cuadra cu ley, y den e caso aki, ley di proteccion di naturalesa. Locual ta yamativo ta e prijs cu e companianan di tour cu UTV/ATV ta cobra. FPNA mes a busca e prijs pa vehiculo y e cobranza di 100 pa 200 dollar pa tour, cu ta indica cu e companianan por saca e gasto di nan UTV/ATV den tres luna.

FPNA ta sinti su mes sosteni pa cartanan di otro organisacionnan di naturalesa y bisiñanan di Parke Nacional Arikok cu tambe tin hopi keho y ta protesta contra e tournan di UTV/ATV. Y hecho ta cu den e periodo di transicion lo permiti UTV, pero bou condicionnan stricto, unda ademas lo mester mantene na e velocidad di 20 kilometer pa ora y no ta permiti ningun ‘spinning ni donuts,’ y ta totalmente prohibi pa drenta areanan unda tin parha, manera Shoco y Sternchi ta broei.

Huez lo dicta sentencia dia 31 di Juli proximo.