‘Never a dull day in Aruba’ nos por bisa, contemplando e problema cu a surgi na e fundacion cu ta administra Parke Arikok. Mirando e situacion actual, e directiva completo a yega na e conclusion cu nan no por sigui carga responsabilidad pa e fundacion. Nan retiro conhuntamente ta laga e fundacion sin capitan riba barco y manera nan mes a indica, ley ta bisa cu mester haci un peticion na hues di Husgado di Prome Instancia pa nombra un directiva nobo pa e fundacion.
E ministro concerni, encarga cu entre otro Medio Ambiente, no a vacila pa actua y awe caba lo tin un audiencia unda un hues lo atende e asunto. Di banda di Pais Aruba ta propone dos persona pa forma un directiva temporal, mirando e urgencia pa e fundacion por funciona. E peticion aki no ta segun loke ley ta stipula, cu ta bisa cu e hues mester atene su mes mas tanto posibel na loke e statuutnan ta stipula (articulo 13 di e ordenanza encuanto Fundacion). Si hues mester sigui e statuutnan, e pregunta ta di cual statuutnan nos ta papiando. Den e caso aki, pa loke ta nombramento, e statuutnan a keda mescos. E bieu ta bisa cu mester nombra cinco miembro, di cual dos nombra pa gobierno, dos pa e personanan huridico o organisacionnan no gubernamental cu tin metanan di atende cu naturalesa y medio ambiente, y e di cinco persona ta keda nombra conhuntamente. Si no por yega na un consenso, e ministro encarga ta dicidi.
En principio, a primera bista e statuutnan nobo ta valido. Pakico? Pasobra e statuutnan bieu ta duna e directiva di e fundacion e libertad pa cambia e statuutnan, sin necesidad di informa gobierno… Imagina bo, e doño di (mayoria) di e tereno ta inicia un fundacion como un administrado pa su propiedad, anto e administrado por pretende cu e ta bay sigui su bida su so. Por cambia statuutnan segun nan ta haya ta bon… E pregunta cu ta surgi ta ken a traha e cos aki?
En todo caso, Pais Aruba ta argumenta cu tal proceso segun articulo 13 lo ta bay dura demasiado y ta propone pa nombra e dos personanan pa un cierto periodo, loke ta duna tempo pa yega na un directiva completo despues. Tambe por comprende cu di parti di e fundacion Aruba Birdlife Conservation a manda un peticion pa corte pa atende e asunto, den nan capacidad di parti interesa (belanghebbende).
Ley, manera bisa anteriormente, ta bisa cu e hues lo mester sigui mas tanto posibel loke ta stipula den e statuutnan, pero ta imaginabel cu hues por inclina pa e proposicion di gobierno den esaki, reconociendo e urgencia pa por tin un directiva pa atende e asuntonan mas urgente, ademas di e posibel conflictonan den directiva desde prome momento. Por spera un veredicto pronto, si no ta di inmediato, ya cu e fundacion no conoce un management cu e facultadnan pa tuma decision, representa e persona huridico, etc.
Den e rueda di prensa di e ministro encarga el a mustra su sorpresa pa e retiro repentino aki, ya cu segun su declaracion nan tabata yegando y hasta a yega na acuerdo tocante varios punto clave, por ehemplo e eliminacion di e cambio di statuutnan cu e directiva a haci recientemente, pa cual segun e ministro no tabatin consulta cu gobierno como e interesado principal.
Si esey ta asina, anto e ta un omision grave di parti di e fundacion, hasta den e caso cu nan statuutnan no ta papia di envolvimento di gobierno den esaki. Sin embargo, ta parce nos nada mas cu un asunto di ‘good corporate governance’ y di fatsoen pa informa, hasta si bo no ta di acuerdo cu e mandatario en cuestion.
Den nan argumentacion e directiva di e fundacion ta alega cu tabatin tres punto riba cual e ministro tabata desea nan cooperacion. Nan ta e ya menciona punto di elimina e cambio di statuutnan reciente y bolbe na e statuutnan original; e cambio di e structura di e directiva, y contradeci e carta cu e organisacion regional DCNA a manda pa e ministro, den cual e organisacion ta duna, segun e ministro, un imagen eroneo di e situacion, en bista di e acuerdonan cu ya nan a logra. E directiva ta bisa cu nan no por reuni e deseonan di e ministro cu nan consenshi y a tuma nan decision.
Straño ta cu den e carta aki e directiva no ta detaya kico e cambio di e structura di e directiva lo tabata encera, Nos por a tende di banda di e ministro cu e idea tabata pa pasa pa un modelo di dos nivel (two tier) unda tin un nivel di director ehecutivo y e nivel di supervision, cu lo ta e papel futuro di e actual directiva. Por lo bisto nada straño den esaki, es mas lo mester a hacie hopi tempo caba; y si nan tin problema cu esey, pakico nan no ta splica esaki.
E asunto ta haci un cos bon cla: ta bira tempo pa revisa maneho di tur fundacion liga na gobernacion, y bin cu regla estricto y uniforme pa tur.
