ORANJESTAD – Ayera durante un conferencia di prensa cu varios miembronan di directiva di Parke Nacional Arikok, entre nan sr. Freddy Refunjol, presidente di Fundacion Parke Arikok, Lufrido Croes Proyect Lider, Natasha Silva director Conservatie, y Julio Beaujon assistent PR Comunicacion, a ser conoci e noticia cu entrada di e parke na Shete lo bay cera entrante dia 1 di april.

Sr. Freddy Refunjol presidente di Fundacion Parke Nacional Arikok, a confirma e ceramento di entrada di e Parke Nacional na Shete. El a manifesta cu nan a manda un carta dia 29 di november di 2018 pa tur e operadornan di tour y esunnan cu ta haci uzo di e entrada ey.

Asina Refunjol a expresa cu nan no a haya ni un reaccion riba e carta ey. Mirando cu nan lo bay cera dia 1 di april, lo bay keda un periodo di interheccion, unda cu pa dos siman lo tin park rangers para den e luga pa mustra pa e hendenan cu e entrada ey no ta accesibel mas, di manera cu mester busca e entrada principal.

Refunjol a duna di conoce cu nan ta den un proceso grandi di reorganisacion di maneho. Segun Refunjol lo bira mas eficiente y operacionnan lo bira mas suave. “E entrada na Shete ta causando hopi destruccion y hopi influencianan negativo riba e naturalesa” el a afirma.

E impacto di contaminacion, zonido, stoof cu ta afecta e matanan; y tambe un parti cu el a bisa cu nan no tin e control manera nan tabatin prome. Refunjol a comenta cu nan ta spera cu e via di entrada principal di piscina natural, miho conoci como Conchi, ta keda accesibel via e ruta di e entrada ey.

Julio Beaujon, assistent PR Comunicacion di Parke Nacional Arikok, a afirma cu realmente e rason di pakico e entrada na Shete ta wordo cera ta pa motibo di conservacion. E parke a cuminsa haya hopi problema cu e vehiculonan cu ta core atras a cuminsa traha nan mesun caminda. Stoof cu nan ta lanta tambe a cuminsa afecta masha hopi mes e vegetacion di e area ey. Tambe otro problema cu a cuminsa aparece ta e vehiculonan di UTV y quadracer, cu ora nan ta pasa riba e santo, nan ta haci masha fini y pa via di esey, ora awa ta yobe e ta kibra e tera y ta afecta e vegetacion.

Beaujon a bisa cu otro problema cu a cuminsa surgi ta e desordo. Gobierno a cuminsa haya keho di comunidad pa via di tur e desordo y vehiculonan cu ta pasa durante dia dilanti di nan cas. El a sigura cu pa cuminsa traha riba e metanan di e Parke Arikok cu ta conservacion, e decision a wordo tuma cu e entrada na Shete ta wordo cera, y tambe cu e fluho di hendenan ta yega via entrada principal lo bay tin un miho control riba kico ta pasa atras.

“Nos lo cuminsa dirigi e maneho pa trece control riba e modo cu e hendenan ta core eytras, y e destruccion cu tambe nan ta haciendo”, Beaujon a manifesta.

Tambe el a bisa cu den pasado, na aña 2010 e Parke Nacional Arikok a purba di cera e entrada dki y despues nan a dicidi di lag’e habri, pero aworaki e influencianan negativo riba e ecosistema a bira asina grandi, di casi 70%, cu mester cuminsa tuma pasonan pa conserva e area.

Beaujon a confirma cu Parke Nacional Arikok lo bay pone varios borchi cu ta indica hendenan e caminda autorisa pa core, pa pasa y pa yega na Conchi.

Refunjol a declara cu e Parke Nacional Arikok lo bay tin un cambio, esey ta inclui e sistema di directiva. Recientemente a introduci un hunta di supervision pa nombra un CEO, cu ainda no a ser aproba. Di mesun manera, tambe ta den proceso di preparacion pa inicia actividadnan pa mantencion di edificio, infrastructura di caminda, utilidad y comunicacion.

Di igual forma, nan a expresa cu e proximo siman nan lo drecha e ruta pa bay Conchi, pa haci di manera mas accesibel pa core cu vehiculonan adecua pa haci esey na un velocidad maximo di 20km pa ora, segun e reglanan di e parke ta stipula.

Fundacion Parke Nacional Arikok lo kier pidi cooperacion y comprension di tur e bishitantenan, companianan di tour, UTV, quadracer pa cu e cambio aki, cu lo ta na beneficio di conservacion di naturalesa den e parke.