Minister di Infrastructura, Otmar Oduber a informa cu via Gobierno, e fundacion Parke Nacional Arikok (FPNA) a cuminsa cu e proceso di adkiri terenonan priva den e area natural y protegi aki.
Ta asina cu haciendo uzo di 1.3 miyon florin di e fondo cu e mesun fundacion a traha p’e, diabierna ultimo nan a adkiri e tereno di Boca Prins, unda antes tabata opera un restaurant. E mandatario a declara cu e fondo uza ta parti di e reservanan cu nan a crea door di e subsidio cu a duna na e fundacion aki, mas otro entradanan cu nan ta haya for di otro actividadnan.
El a splica cu normalmente e maneho ta cu fondo di subsidio no mag di uza nan pa otro metanan. Sinembargo, mirando cu FPNA ta haya diferente entradanan, a logra e adkisicion di e tereno aki. El a elogia cu un fundacion asina por a crea un fondo pa keto bay nan por cuminsa atende cu e adkisicion di tereno priva ubica den nan area teritorial.
Oduber a indica cu e problema di tin tereno priva den parke ta trece cune cu dificilmente nan lo por tin un control mas stricto riba kico mag y kico no mag di haci y cu hopi biaha ta crea conflicto den e maneho.
Tin alrededor di 17 pida tereno situa den parke y cu ta den man priva, pero e diferencia cu esun di Boca Prins ta, cu nan no ta den actividad. Pero tin dos of tres mas cu ta den actividad y cu e fundacion hunto cu gobierno kier yega mas pronto posibel na un acuerdo cu nan.
Encuanto si den e lista di adkisicion ta aparece e tereno/propiedad conoci como Cas di Commandeur na haltura di fontein, e mandatario a prefera di no bay mucho den detaye pa evita speculacion na e momento aki. E propiedad aki –cu segun Bon Dia Aruba por a compronde– no ta aparece riba e lista di monumentonan protegi, a wordo adkiri pa un grupo Venezolano cu un fin turistico, pero e proyecto no a sigui.
E mandatario a bisa cu FPNA tin e detayenan rond di e propiedad aki. Aunke e ta un propiedad conoci, na opinion di Oduber, mester por ta den e prioridad pa por yega na un acuerdo cu nan tambe pa adkiri e propiedad aki.
Intencion ta cu unabes cu parke ta adkiri e propiedadnan aki, e lo sigui opera nan, pero cu e reglanan cu ta regarda e conservacion y cuido di e area cu ta cay bou supervision di FPNA.
Igualmente, FPNA a bin cu cambionan den nan statuto pa amplia e rol cu e fundacion aki tin, pero tambe su nomber. E no ta Parke Nacional Arikok mas, sino cu el a bira Parke Aruba.
Actualmente nan ta encarga cu e area di Spaans Lagoen, pero tambe nan lo ta encarga cu e control di e 16 areanan natural cu lo wordo protegi den cuadro di e ROP nobo. Tambe FPNA lo ta encarga cu e Parke Marino, cu ta na caminda pa wordo ehecuta.
