Parhanan migratorio fotografia na Aruba ta hala atencion na Merca

Cu yegada di herfst, e temporada di migracion pa parhanan a cuminsa. Hopi parha ta keda na Aruba pa un temporada hopi cortico, apenas algun dia of siman. Pa amantenan di parha, esaki ta un oportunidad cu simplemente no por perde, maske ta rekeri esfuerso pa logra mira algun di e parhanan aki.

Esey tabata e caso di conocido fotografo Arubano, Michiel Oversteegen, kende recientemente a hala atencion na Merca debi na potret cu el a saca di “roseate tern”.

Wiscasset Newspaper di Maine, Merca, recientemente a publica un articulo di Jeff and Allison Wells, tocante e roseate tern cu a observa na Aruba. “Pa mayoria entusiasta di parha na Merca, un roseate tern ta un parha special cu ta tuma esfuerso pa mira. Por mira nan regularmente na apenas algun lugar unda nan ta traha neishi na Merca.” Segun Wiscasset Newspaper, e parhanan ki tin un distribucion global inusual, reproduciendo riba islanan rond di Australia, Sur Oriente di Asia, partinan na costa di Africa, partinan di costa di Europa, Caribe, y partinan di costa di Canadian Maritimes.

No ta mira nan hopi den migracion, segun e corant, pasobra nan ta haci nan migracion leu di costa y ta asumi cu nan ta hacie rapidamente. Y mientras cu tecnologia ta avansando nos comprension di migracion, incluyendo di e comportamento migratorio di e roseate tern, ainda tin hopi pa siña di e metodo di ‘bird banding’, esta pone banchi riba pia di parha.

E corant ta nota cu Oversteegen, un guia di parha y fotografo talentoso di Aruba, ta bin buscando y sacando potret di parha cu banchi na Aruba pa añas. Asina el a haya un roseate tern algun aña atras na Aruba, cu a resulta cu a haya su banchi tempo cu e tabata chikito aya na Maine, Merca. E corant a skirbi tocante esaki na 2020.

Cantidadnan chikito di roseate tern ta traha neishi na Aruba. E origen di e parhanan cu ta mira aki den herfst tabata historicamente misterioso. Oversteegen a saca potret di un roseate tern cu banchi na Aruba pa prome biaha na 2014. E parha en cuestion a ricibi su banchi na New York. Na 2019, el a haya otro parha cual a pone su banchi na Massachusetts, y despues el a haya e parha na Maine na 2020.

Pero e aña aki a trece otro sorpresa: Oversteegen te awo ya a haya dies roseate tern cu banchi na Aruba na september. Cinco di nan, a haya nan banchi poni na New York, uno na Connecticut, uno na Massachusetts, uno na New Hampshire y dos na Maine.

Otro investigacion a haya cu mayoria di e roseate tern cu ta traha neishi na New England eventualmente ta biaha sur na costa di Brazil pa winter. E corant ta specula si e parhanan aki regularmente ta bay direccion west cerca di Aruba durante nan biahe migratorio bayendo sur, of si ocasionalmente ta bin keda akinan como resultado di horcan of otro variable di clima? Con cu ta, e areanan marino rond di Aruba y otro sitionan di Caribe y na e costanan nort di Sur America ta areanan importante pa hopi parha busca cuminda y descansa. Mantene e costanan saludable ta e unico manera cu por sigura cu ta bay tin roseate tern pa nos yiu y nietonan.

Tur aña, miles di parha migratorio di tur parti di mundo ta haci e biahe largo y ta bishita Aruba pa descansa, recarga of broei prome cu nan bolbe nan pais di origen. Migracion masal di parha cu ta bula distancianan largo y cubri varios continente, ta posibel cu guia di nan instintonan, señalnan medio ambiental y strategia. E migracion ta un comportamento compleho cu ta sirbi propositonan ecologico, evolucionario y di sobrevivencia. Esaki segun un publicacion di Directie Natuur en Milieu cu ocasion di e ultimo Dia di Parha Migratorio, cu ta tuma lugar na mei.

Parhanan migratorio ta depende di diferente fuente di awa manera, lama, lagun, rooi, dam y bahia. Y manera na paisnan mas grandi cu tin otro fuentenan di awa manera: lagonan, marshes y pantanonan (swamps). Na e sitionan aki siguramente lo tin matanan cu ta brinda lugar pa alimenta, broei, sosega y sconde. E areanan unda tin awa y mata ta forma habitat ideal pa parhanan. E areanan aki ta importante pa nan descansa pa haya forsa despues di nan biahe largo y tambe temporada friu na otro parti di unda no ta originalmente. Pero nan

habitat y ecosistema acuatico ta bao menasa door di factornan humano y demanda pa awa y espacio. Algun factornan adicional cu ta forma menasa ta entre otro polucion, cambio climatico y scarsedad di awa.

Aki na Aruba tambe nos tin areanan cu ta bira habitat pa parhanan manera bahia, saliña, dam y rooi. E lugarnan aki hopi biaha a bira drumidera di parhanan local y esunnan cu ta di bishita. Manera tur caminda aki na Aruba tambe nos por mira e factornan cu a bira retonan local, manera scarsedad di awa pasobra ta temporada di secura, nos damnan ta seco, tin demanda halto pa espacio pa vivienda. Nos saliñanan natural tambe ta seco. Ta un solo lugar cu tin awa na abundancia ta na Bubali Plas y aki tambe por wak mas parhanan tambe.

Ademas, insecto ta esencial pa parhanan migratorio. E insectonan ta contene hopi nutriente y ta fuente di proteina pa parhanan migratorio. E parhanan tin necesidad di bon nutricion pa nan mes pero tambe pa nan duna di come na nan yiunan. Asina ta sigura existencia di diferente sorto di parhanan migratorio. E presencia di insectonan ta aporta grandemente na e momento di migracion di parhanan. Durante nan parada na diferente luga riba nan ruta, e parhanan ta busca insectonan den mondi, saliñanan of otro habitat. Tambe nan ta busca pa gara insectonan den aire of ta coba pa esakinan den troncon di vegetacion. Hopi biahe of migracion di parhanan ta coincidi cu abundancia di insectonan na e localidad di descanso.

E migracion di parhanan ta un fenomeno bao menasa. Esaki ta particularmente pavia cu e populacion di insecto, di cual e parhanan ta depende, ta bahando drasticamente.

DNM ta destaca cu presencia di insectonan ta influencia grandemente e tempo, duracion y exito general pa e migracion di parhanan. Durante e trayecto, parhanan ta para na diferente luga riba nan ruta. Nan ta busca pa insectonan den areanan di cosecha, mondi, saliñanan, ‘wetlands’ y otro habitat. Parhanan cu ta come insecto ta cubri un variedad diverso di insectonan den nan dieet. Esakinan ta inclui abeha, sangura, musca, bichi, barbulet, tor y tambe invertebra acuatico manera e spirito di cabrito (tambe yama dopi dopi). P’esey no ta tur ora ta bon pa spuit cu insecticida. Parhanan cu ta come insecto ta yuda combati infestacion di insectonan cu por causa daño na cosecha of tambe combati plaga cu ta propaga malesa.

85% di matanan cu ta floria ta rekeri polinisacion y esaki hopi biaha ta trabao di insectonan. P’esey si nos perde e polinisantenan nos matanan lo lucha pa biba y tambe parhanan cu ta depende di nan.

Observacion y monitoreo di parhanan migratorio usando ciencia cu ta envolve participacion di hende ta yuda cu conscientisacion. Manera ken no ta corda e conteo nacional di parha, algo asina tambe por haci pa esunnan migratorio. Pa medio di campaña educacional di medio ambiente y naturalesa por duna data importante pa restaura y maneha habitatnan esencial cu ta beneficia y conecta parhanan migratorio.