Un pareha Britanico a bisa cu nan vakantie a wordo daña pa un construccion banda di nan hotel, y nan ta exigiendo un reembolso completo.

Dawn Brett y su esposo David, ambos di 59 aña di edad, a conta e medio Britanico Metro cu nan a spaar alrededor di seismil dollar pa un vakantie di luho, di dos siman, na e Riu Palace Hotel na Aruba luna pasa. Nan a keda na un hotel cercano den pasado y a ‘encanta’, pero nan a bis Metro cu e bishita e aña aki tabata ‘horibel’.

Riba video cu nan a saca banda di pool por mira un construccion enorme ta pone un sombra riba e turistanan, y por scucha claramente zonidonan mecanico.

Tui, e compania a traves di cual a reserva e biahe, a insisti cu nan a adverti e pareha tocante e proyecto di construccion, pero a bisa cu e zonido y interupcion lo ta ‘sporadico’. Un representante di Tui a yama e pareha, kendenan ta di Orpington na Kent, Inglatera, pa check cu nan a ricibi e carta informando nan di e construccion. Dawn a bisa: “Mi a puntra si esaki lo tin efecto riba e vakantie y nan a bisa no, cu e no lo causa un problema y tabata algo chikito. Si nan lo a mustra nos e potret y bisa nos cu e zonido lo ta bay ta di 7am te 4pm tur dia, nos no lo a bay of nos lo a cambia e hotel, pero no a duna nos e opcion ey.”

E pareha a bisa cu e vakantie tabata yen di ‘zonido constante, boramento y makinaria’.

Dawn a bisa: “Nos tabata sinta banda di pool pero no por a relaha, e tabata horibel. Bo por bira bo cara pa no mira, pero no por cera bo horea. Nos no por a handle e zonido. E tabata riba e pool. No tabata relahacion. Nos a pasa mayor parti di e vakantie den area di pool. Tin beach bunita, pero ami no ta un hende di beach, mi no gusta santo.”

E pareha a considera pa cancela su vakantie riba e di siete dia y a pidi na representante di TUI si esey tabata posible. E representante a ofrece pa check pa un vuelo back na Inglatera, pero Dawn y David no a bay door cu esaki pasobra “no tabata un decision facil of rapido, pasobra e ta un vuelo di nuebe ora y mey y nos no tabata sa si nos lo haya compensacion si nos bolbe un siman trempan.”

E pareha a keda durante henter e dos siman, pero awo nan ta insisti pa haya un reembolso.
“Nos a spaar pa un bon tempo, e ta hopi placa y nos tabata anticipando”, Dawn a bisa. “Mi no ta bay djis lubida y acepta loke a pasa. Mi no ta bay reserva cu nan atrobe.”

Tui a bisa:

“Nos ta compronde e frustracion di Sra. Brett despues di su experiencia di vakantie. Nos a tuma contacto cu Sra. Brett y otro clientenan afecta riba dos ocasion separa prome cu nan a sali, pa laga nan sa di e trabao di construccion cerca [di e hotel]. Nos por confirma cu Sra. Brett a reconoce cu a ricibi e comunicacionnan aki y a dicidi di continua cu su vakantie manera planea. Nos ta monitor e progreso di e hotel nobo cu ta construyendo cerca di Riu Palace Antillas di cerca. Maske e contratistanan no a duna plan ni schedule, nos ta compronde cu maske no ta constant, e actividad a aumenta mas recientemente y bira mas riparabel. Pa motibo di e naturalesa y ubicacion di e trabao, hunto cu e herment y ekiponan anticipa pa wordo usa, ta probable cu bo lo por scucha y mira esaki ta tuma lugar sporadicamente for di areanan publico den cercania. Nada a cambia relaciona cu e standard y servicio cu Riu Palace Antillas ta ofrece. Management di e hotel ta insisti cu maske ta fuera di nan control, ta bay tuma tur medida necesario pa reduci e impacto di e proyecto aki riba bo vakantie – esaki ta inclui duna un camber leu di e area afecta, suheto na disponibilidad y nivel di ocupacion di e hotel.”