(Mercopress) – Presidente di Chile Sebastián Piñera ta conclui cu su bishita na Paraguay cu exito y a anuncia cu Chile y Paraguay ta mas cerca cu nunca na un acuerdo liber di comercio.

Piñera y su colega Paraguayo Mario Abdo Benítez a confirma e informe aki durante un conferencia di prensa conhunto, pa splica e progreso cu a haci durante e reunionnan.

Abdo a bisa cu e dos gobiernonan lo traha pa bienestar di economia di Paraguay y Chile, y cu e relacionnan bilateral a bira un herment strategico pa logra esaki. Abdo tambe a reitera cu lo por firma e acuerdo comercial liber den poco tempo.

Ambos hefe di estado tambe a toca e tema di conectividad, particularmente e Corridor di e Ruta Bioceanico, cu lo por permiti Paraguay bira un partner strategico pa haya acceso na mercado, den un forma mas competitivo, pa logra produccion den henter e region,” e Presidente di Paraguay a señala. El a agrega cu e prome fase di e caminda oceanico lo mester ta cla pa Februari 2022.

E dos Presidentenan tambe a papia di e Zona di Comercio Liber cu Paraguay tin na Antofagasta y riba e oferta cu e pais a haci na Chile pa lanta su propio, na Vileta, Chaco’i y tambe probablemente na Carmelo Peralta.

Otro tema cu a discuti tabata e cable di conectividad submarino cu ta conecta e region for di Chile te Asia y Australia. Esaki ta un proyecto multinacional cu paisnan di Conosur a inverti den dje.

Mientrastanto, Piñera a anuncia cu Chile ta haci un donacion di 100 mil vacuna AstraZeneca, contra COVID-19. Esaki lo ta e di dos asistencia di Chile na Paraguay desde cu e pandemia a haci su entrada. “Nos lo sigui skirbi paginanan den e historia fraternal di amistad entre Paraguay y Chile,” Piñera a bisa na conclusion di e conferencia di prensa, y a añadi cu ambos hefe di estado a discuti un Acuerdo di Complementacion Economico. E di cuater ronda cu ta e ultimo lo tuma luga na October.

“Nos a haci progreso den termino di integracion y specialmente, den uni forsa pa enfrenta e retonan mas grandi di e temponan aki,” Piñera a sigui bisa.

Paraguay tabata e otro destinacion den e tour regional di e Presidente Chileno, kende a bishita Uruguay y Colombia e siman aki. Na Colombia el a discuti cu Presidente Ivan Duque riba reforsa e Aliansa Pacifico y Prosur, como tambe medidanan contra e pandemia di coronavirus. ”Guera, violencia por lanta den un instante. Pero ta vocacion, compromiso, resiliencia ta percura pa paz. Y nan no ta bin di nochi pa mainta. Pero e ta e ruta cu mester cana,” tabata locual Piñera a bisa na Colombia.