(AP) – Administracion di presidente Mericano, Joe Biden ayera a impone sancion riba un compania di tabaco Paraguayo pa supuestamente enrikece e ex-presidente controversial di e pais, un magnate di sigaria sanciona aña pasa pa Cas Blanco pa corupcion.
Departamento di Tesoro Mericano a bisa cu tabata enfocando riba productor Tabacalera del Este pa su vinculo cu Horacio Cartes, un di e hombernan mas rico di Paraguay kende a fungi como presidente di 2013 te 2018 y ainda tin poder politico significante na e pais. Presidente actual di Paraguay, Santiago Peña, ta un protegido politico di Cartes kende tambe ta bin di e partido conservador dominante, Colorado.
Citando un “patronchi concerta di corupcion,” Departamento di Tesoro aña pasa a sanciona Cartes pa acusacionnan cu el a paga miyones di dollar di soborno na legisladornan pa habri su caminda pa poder y cu el a cultiva lasonan cu grupo militante Libanes, Hezbollah, cual ta kere ta opera den e Frontera Triple poroso entre Argentina, Brazil y Paraguay.
Na mesun tempo, Tesoro tambe a designa cuatro compania controla pa Cartes den sectornan principal di economia Paraguayo, incluyendo criadero di ganado, tabaco y bienes di consumidor.
Cartes a rechasa e acusacionnan di corupcion como motiva politicamente. No tabatin respuesta inmediato di compania Tabacalera del Este. Number di telefon riba website di e compania tabata desconecta.
Cartes ta bisa cu e ya no ta doño ni ta involucra activamente den maneho di Tabacalera del Este, un compania cu a genera sospecha entre competidornan di contrabanda, mirando su volumen enorme di benta di sigaria.
Asina mes, Departamento di Tesoro ayera a acusa Tabacalera del Este di transferi miyones di dollar p Cartes “den un acuerdo di benta.” Oficina di Control di Activo Stranhero di e departamento aña pasa a identifica Cartes como propietario di un interes di 50% of mas den e compania, directa- of indirectamente.
“Merca ta keda dedica na sigura responsabilidad pa Cartes y pa promove reforma anti-corupcion significativo na Paraguay,” segun vocero di Departamento di Estado, Matthew Miller.
Cartes actualmente no ta enfrentando cargonan na Paraguay, y aña pasa a keda eligi como presidente di Partido Colorado, cu ta controla mayoria di asiento den ambos camara di Congreso.
Controversia – y investigacionnan di cumplimento di ley Mericano – a sigui e politico durante su carera como comerciante lider di e pais. Acusacionnan di fraude cu placa a mand’e prizon pa algun luna na comienso di 1986. Despues a retira tur acusacion.
Aña pasa, Procurador General Paraguayo a lansa un investigacion criminal riba acusacionnan di corupcion contra Cartes di Departamento di tesoro, pero no tin resultado.
Departamento di Estado Mericano a bisa cu corupcion profundo na Paraguay hopi biaha ta preveni condena criminal den casonan di labamento di placa y financiamento di terorismo.
Maske agencia di rating Moodys luna pasa a eleva Paraguya na status di grado di inversion, citando e crecemento economico di e pais, analista y inversionista a expresa preocupacion tocante crimen organisa endemico impulsa pa contrabanda di sigaria y droga.
