Te fin di aña pasa, Jorge Ramón Riquelme Ibarra tabata eherce funcionnan diplomatico como Consul Segundo di Paraguay na Argentina. Diahuebs pasa el a ser aresta cu 67 pan di marihuana (27 kilo) na un control di auto. E tabata sigui uza e identificacion di consul na su auto pa evita control.
Riquelme Ibarra a ser deteni den un procedemento di rutina riba avenida Acceso Sur na e ciudad di Guarambaré na Paraguay.
Segun e prensa Paraguayo a informa, e cacho anti droga a reacciona di manera ‘positivo’ ora el a hole e auto. Tabata na e momentonan ey cu e conductor a intenta scapa di e control, ora el a presenta su identificacion cu e papel diplomatico, a pesar cu el a stop di cumpli cu e funcion.
Sinembargo, agentenan a dicidi continua cu e proceso y nan a hiba e auto na e base di Secretaria Nacional Antidrogas (Senad) pa realisa e revision, pa disposicion di e Fiscal Carlos Alcaraz.
E inspeccion a confirma e sospecha. Paden di auto marca Audi di color shinishi, cu patente di Argentina, nan a haya 27 kilo di marihuana distribui den 67 pan, ademas di 18.000 peso Paraguayo.
E ex-consul tabatin un funcion diplomatico na Buenos Aires durante e gobierno di Horacio Cartés, di Partido Colorado. E nombramento tabatin relacion cu un controversia na Paraguay hunto cu un dozijn di otro consul pa e caracter ‘politico’ di su nombramento. Pero su mision a termina na november di 2018 pa e gestion di Mario Abdo Benítez.
