Ayera tardi den cayanan di San Nicolas e muchanan a jump ariba musica di carnaval y a disfruta di e ultimo parada pa mucha di Carnaval 70. Ambiente di carnaval, luho y creatividad no tabata falta y asina pueblo di Aruba a disfruta di un tremendo parada di mucha.
Un total di seis grupo a participa den e parada. Centro di Bario Noord a habri parada hunto cu Reina Infantil di Aruba su Carnaval, Xeena Dijkhof. Hunto cu Centro di Bario Noord tabatin diferente scol cu tambe a uni na e celebracion di Carnaval
Champange Kids Carnival Group tabata grupo dos cu nan tema Universal Studios. Fantasia y luho a resalta na unda e muchanan a difrasa di e diferente personahenan di caricatura di e peliculanan di Universal.
Grupo number tres tabata Don Flip Carnival Group cu tabatin e tema di Amazonia. Rindiendo homenahe na naturalesa e muchanan a presenta trahenan yen di color y fantasia.
TOB Kids tabata grupo number cuater cu a luci e tema di e pelicula Coco. Trahenan briyante cu carosanan luhoso a resalta y cu a representa e diferente aspectonan di e pelicula Coco hopi bunita.
Grupo cinco tabata Little Groovers Carnival Group cu e aña aki tabatin como tema e pelicula infantil Inside Out. E gupo a luci trahenan hopi bunita cu a trece pa dialnti e diferente temanan di e pelicula y ambiente di carnaval no tabata falta.
Empire Kids a cera e parada cu nan tema Sapate. Un grupo cu pa prome biaha ta participa den parada di carnaval di mucha y cu a luci ariba caminda. Carosanan luhoso y creativo a resalta y e muchanan contento disfrasa na e diferente estilonan di sapato.
Manera ta tradicion despues di Parada di Mucha na San Nicolas tin kimamento di momito pa asina dispidi di e paradanan di mucha di carnaval. Aruba completo a disfruta di un parada cu hopi alegria, fantasia, creatividad y luho.
