Parada di mucha a conclui cu 8 detencion

Parada di mucha a sali na ora, esta 2’or di atardi y e cabes a yega Joe Laveist 5’or y 45 di atardi. Last lap a termina pa 6’or y mey di atardi. E parada di mucha a conta cu 7 grupo y 115 polis cu tabata riba pia pa mantene ordo publico, segun vocero suplente policial Liliana Rasmijn.

Na momento cu a entrevista vocero di polis Lito Lacle riba Lago Weg, el a indica cu e parada tabata bayendo bon y tabatin 1 incidente unda cu un mucha a cay for di Roadpiece. E momento ey a warda un rato pa el a haya atencion medico prome cu a continua cu e parada, e mucha ta bon si polis a indica. Te cu e momento ey no tabatin ningun pelea, esaki a cambia den area di Carnival Village bay final. Sinembargo e parada tabata relativamente trankil.

Den total tabatin 8 detencion, den cual ta tuma nota cu consumo di mas di alcohol ta e motibo principal. Entre e detencionnan tabatin 5 persona adulto y tres menor di edad. E actitud di e muchanan deteni tabata duna indicacion cu nan no tin cun’e cu nada y ta haci señalnan y purba mustra “tof” y fresco durante di nan detencion, tur a wordo hiba warda di polis.

Control higiena

A tuma nota tambe cu polis ria henter e ruta di parada di mucha a para na e diferente bendedonan di cuminda y a controla cu tur cos ta na ordo prome cu e parada a pasa.

Polis tabata hopi activo y visibel constantemente riba e ruta basta prome cu e parada mes cuminsa, pasando ariba abou manteniendo ordo. Den un di e controlnan ey un polis atento a tuma nota di un conoci di polis, malo cu no tabata permiti pa ta den actividadnan publico pa motibo cu e tin un ke otro malesa contagioso incluyendo tuberculosis.

Banda di tur esaki e actividad a caba na ora segun polis cu a spera cu pa 6’or e lo a yega final.