Celebrando herencia cultural cu orguyo Fundacion Chico Harms conhuntamente cu otro partners como Departamento di Cultura e aña aki y un biaha ta bay yena e bario di Brazil un biaha mas di tradicion y musica.
Pa mañan diabierna 1 di september ta bay tuma luga e Parada di Lanterna na unda tur participante cu ta bay den e parada mester tin lanterna den man pa lusa e caminda.
Pa diasabra 2 di september tin e Festival di Tambu na Centro di Bario Brazil y dia 3 di september ta e Parada Folklore Cultural y Dia di Brazil 2023.
Fundacion Chico Harms den un conferencia di prensa na juli ultimo a splica cu e aña aki e fundacion a bin cu un iniciativa cu ta encera cu e casnan cu ta keda riba e ruta di e parada di lanterna y cultural, por decora nan cas y e fundacion ta bay duna un premio na e cas cu ta miho decora.
“Nos kier informa e bario unda cu e ruta ta pasa pa duna un iniciativa pa nan decora nan cas, cual nos lo bay saca e cas miho decora. Ta mescos ora di temporada di carnaval, tin un trailer ta gana e premio, nos a pensa pakico no haci’e cu un cas cu ta riba e ruta,” Tito Tromp coordinado di e paradanan a bisa.
Pa loke ta e ruta di e paradanan, el indica cu tur dos parada ta sali for di Centro di Bario Brazil direccion pa misa di Brazil. Na e crusada ta bira links pa drenta caminda di Cura Cabay y yega St. Michael School cu tambe ta bay participa.
Despues e parada ta drenta caminda di Noord Cura Cabay, direccion noord y ta bira bin back misa di Brazil y ta termina back na Centro di Bario Brazil.
Parada di lanterna ta sali 6or di atardi for di Centro di Bario Brazil y Parada Folklore Cultural ta sali pa 3or di atardi.
Pa e aña aki, Vicente Croes a ser scogi como Baluarte Cultural 2023, baluarte ta un persona masculino dedica na nos folklore y cultura Arubiano.
Vicente ta un musico, un mentor cu hunto cu su famia a funda e banda tipico “Un Brindis”. Vicente hunto cu su yiu Joselito ta composita canticanan pa e grupo aki.
Esaki ta marca 7 aña cu Vicente ta composita cantica pa su esposa cu ta lider “Grupo di Antaño” pa nan por subi caya den Parada Folklore Cultural.
Aña pasa, Fundacion Chico Harms tabata sinti masha contento y masha feliz di mira e gruponan cu tabata participa y cuanto tabata inscribiendo pa participa den e parada grandi cu a tuma luga dia 4 di september 2022, na e tempo ey tabatin 10 grupo caba cu pa nan ta nifica un satisfaccion cu ta nifica cu e interes no a caba y cu e ta keda crece.
