Temporada di Carnaval a cuminsa y diasabra ultimo Aruba a celebra su parada di Flambeu of Fakkel na Playa cu a cuminsa desde 8or di anochi cu e asistencia di 10 grupo.

Cuerpo Policial conhuntamente cu SMAC y Minister Xiomara Ruiz- Maduro a cende e flambeu pa asina inicia e temporada di carnaval 66. Cuerpo Policial a anuncia cu nan tabatin 125 polis riba caya, esaki consistiendo di e parti uniforma, recherche , ME, AE, administrativo y tambe CEA.

Di mesun manera, nan a informa cu pa 00:45 e cabes di e parada a yega ex DOW y pa 2:33 e ultimo grupo a yega te final. Tambe nan a informa cu e aña aki e detencionnan a baha, nan tabatin un total di 5 detencion, relaciona cu buracheria , bringamento y tambe droga. Compara cu aña pasa e parada di flambeu por a conta cu 11 detencion.

Ademas, Cuerpo Policial a manifesta cu Motorunit a reparti 30 multa despues di e parada di Flambeu of Fakkel na unda nan a coloca den puntonan strategico motorunit pa eherce su controlnan.

Mas o menos 170 auto a wordo para y controla. Un total di 30 multa a wordo reparti entre otro pa surpasa velocidad maximo, core cu celular den man, maneha sin rijbewijs y core bou influencia di alcohol. Nan a pone enfasis cu 3 chauffeur a ricibi un multa pa surpasa velocidad maximo, nan tawata coriendo ariba 140 km pa ora, 7 chauffeur a wordo deteni pa core bou influencia di alcohol di cual 3 di nan a wordo “ingevorderd” (Kita nan rijbewijs).

Di loke ta trata fin di aña 2019, vocero di Polis Lito Lacle a duna di conoce cu tabatin 8 morto den trafico, 2 morto cu brommer, 3 peaton, 2 no a duna preferencia y 1 cu a dal contra un rotonde.

Di mesun manera, el a recorda cu normalmente nan tin e cifra di 8.000 dalmento, 666 pa luna y un averahe di 12.000 vehiculo envolvi den esaki pa aña.

Tocante asesinato, el a comunica cu tabatin 3 di e cual tur a wordo resolvi, den cifranan di atraco te cu mey di december tabatin 46 atraco di e cual 33 a wordo resolvi, el a laga sa cu ainda ta falta cifra pa cu esaki.

83 persona a wordo deteni na aña 2019, di e cual 56 ta di nacionalidad Hulandes (Arubiano), 20 Venezolano, 6 di nacionalidad Dominicano y 1 Colombiano.

Tambe, Lacle a confirma cu e cifra di personanan deteni cu nacionalidad Venezolano a aumenta e ultimo dos luna di aña 2019, na september nan a detene 5 y pa december na tabatin un total di 20.

Di otro banda, casonan di maltrato a yega te 17 lo cual el a specifica cu ta un cifra alarmante y e mayoria di nan ta pa causa di alcohol.