Ayera den oranan di atardi, bario di Brazil tabata di fiesta cu e Parada Cultural cu Fundacion Chico Harms a organisa pa asina cuminsa cu un serie di actividadnan, cu lo caba dia 4 di september cu un parada grandi “Folklore Cultural di Brazil”.

Band’i 4or di atardi e cinco grupo bisti cu diferente paña y shimisnan colorido tabata cla wardando e yamada di salida, mientras cu un tiki di nubia cu awa a pasa. Despues di esey nan a cuminsa cana den e parada yen di musica acustico cu algun participante tabata toca.

Francisco “Chico” Harms a expresa cu nan tabata hopi contento di mira e entusiasmo cu e participantenan tabatin despues di dos aña cu e actividad aki a ser cancela pa motibo di pandemia di Covid-19.

“Nos ta bon prepara y a keda hopi bunita, mi ta kere cu hopi hende ta bay cera conoci cu kico nos kiermen cu esaki, sin nada di coriente”, el a declara.

Compara cu e prome biaha Harms a expresa cu tabatin mas hende participando unda cu despues cu nan a sali for di Misa di Brazil nan a yega te sede di Bario di Brazil pa asina ey sigui celebra e prome actividad aki di aña 2022.

Di su parti Leo Harms a expresa cu “esaki ta cultura di Aruba, esaki ta nos identidad” di e forma aki cualkier persona por expresa su identidad y di na unda e ta bin, “di kico tabatin prome cu bo a nace, kico nan a siña bo y kico bo kier pa e futuro generacion di cultura di Aruba”, el a bisa.

Door cu e tambe ta miembro di e fundacion, Harms a expresa cu nan kier pa e hendenan y full Aruba haya sa cu “esaki ta nos, no lubida kico cultura di Arubianonan ta”.

El conta cu e tabata sinti masha contento y masha feliz di mira e gruponan cu tabata participa y cuanto lo ta inscribiendo pa participa den e parada grandi cu lo tuma luga dia 4 di september, aworaki tin 10 grupo caba cu pa nan ta nifica un satisfaccion cu ta nifica cu e interes no a caba y cu e ta keda crece.

Como parti di e actividadnan, pa dia 23 di juli y 30 di juli nan tin organisa e Festival Cantica di Caya Arubano, eleccion di Reina Folklore Cultural di Aruba unda cu eleccion di reina ta plania pa dia 20 di augustus den e categoria di mucha y dia 27 lo tin eleccion pa Dama Cultural y Gran Dama Cultural.

Tambe, 27 di augustus lo tuma luga e show pa Dama of Gran Dama, pa dia 2 di september nan ta organisando e Parada cu Lanterna den Brazil cu e aña aki ta cumpli cinco aña den cual nan ta subi caya cune y pa finalisa, pa dia 4 di september nan a anuncia e parada grandi mes “Folklore Cultural di Brazil”, den e parada aki nan lo tin cinco banda y cinco disco.