Brazil- Fundacion Bernadina Growell Kock orguyosamente ta anuncia e tema oficial pa e trahenan pa e gran Parada Cultural di celebracion di Dia di Brazil. E parada ta wordo organisa pa Centro di Bario Brazil y ta tuma luga riba diadomingo 4 di september 2016. E trahe crioyo pa e cabayeroran ta wayaberanan di tur color, pa asina refleha e ambiente tropical di nos pais Aruba. E damanan ta bisti un diseño di señora Maria Thiel, ruman di Bernadina Growell (dfm), cual ta un shimis elegante.
E shimis a ser confecciona como regalo pa nos Mama di Cultura di Aruba, Bernadina Growell Kock pa por a estrena durante di diferente actividad cultural y evenementonan protocolario acompaña pa nos Tata di Cultura señor Juan Chabaya Lampe, miho conoci como Padu del Caribe. E diseño di e trahenan ta wordo presenta durante di e parada, manera ta aparece riba e potretnan anexo.
E cabayeronan por uza tur tipo di diseño di wayabera y e damanan ta uza telanan di tur color y cu un print di flor chikito manera e diseño original. Fundacion Bernadina Growell Kock ta invita e pueblo di Aruba en general cu kier forma parti di nos grupo, pa asisti na un reunion cu lo tuma luga diamars awor dia 9 di augustus 2016 cuminsando pa 8:00pm na Cas Parokial di misa di Brazil. Durante e reunion ta duna mas detaye y ta parti copia di e diseño y e tipo di tela cu mester wordo uza. Sinceramente e fundacion ta spera di por haya mas participantenan pa e tremendo parada cultural pa asina por sigui engrandece e grandioso manifestacion cu cada aña ta birando mas bunita y cultural. Pa mas contacto por yama libremenete na sra. Lena Orman, na number 565-11-45 of cerca cualkier miembro di Fundacion Bernadina Growell Kock. Potretnan cortesia di Departamento di Cultura Aruba, sr Freddy Montoya. Modelonan riba e potret: sra. Fatme Rigaud y sr. Persey Jeandor.
