Despues cu a cuminsa traha riba e rotonde nobo di Super Food locual a conduci na problemanan grandi den e fluho di trafico, minister di Infrastructura a dicidi di para e trabou. “Un rato pasa mi a combersa cu director di DOW den oranan mas trempan awe tawata tin contacto cu e contratistanan cu ta bezig cu Watty Vos Blvd.
E rotonde na altura di Super Food ta parti di e proyecto PPP aki. A palabra cu e director cu e situacion di trafico awe durante di dia no ta aceptabel y tampoco por continua y DOW ya caba tin palabra cu e contratista pa sinta mañan mainta y trece cambionan radical, mañan mes, pa por logra agiliza e fluho di trafico den e area aki”, asina minister Otmar Oduber (POR) a bisa riba su Facebook.
DOW mes a confirma esaki den un relato despues. Awe nan lo reuni cu e contratista principal esta Mota-Engil pa asina evalua kiko lo ta e cambionan cu nos por haci pa mehora e fluho di trafico. “Te ainda no a cuminsa cu demolicion y pesey nos ta na ora ainda pa modifica e ruta di desviacion pa asina percura pa e molester ta menos alabes cu e trabounan por tuma luga”, asina DOW ta bisa.
