Papiamento mester bin na prome luga

E linguista di Papiamento Sr. Ramon Todd Dandaré a declara na Bon Dia Aruba cu nos lenga materno, esta Papiamento, ta bibo den  nos comunidad.

El a indica cu nos tin un gran cantidad di corant y otro medio di comunicacion na Papiamento, obra literario na Papiamento, pero, entre otro, tambe nos ministernan y parlamentarionan ta papia Papiamento cu  pueblo y entre nan mes, y e uzo aki ta haci cu Papiamento ta bibo den nos comunidad.

“Tanten cu nos sigui toch cu Papiamento pa nos comunica cu otro y nos pas’e di generacion pa generacion, e ta keda bibo”, el a bisa.

Den cuadro di conmemoracion di Dia Internacional di Lenga Materno celebra diadomingo ultimo, e linguista  y docente di Papiamento Sr. Todd Dandaré a bisa cu tanten nos comunidad ta papia nos idioma aki na Aruba “Papiamento ta bibo, e ta vital”. 

Pero nos por ripara cu tin hopi persona cu den nos Papiamento ta uza palabra di otro idioma. Tin hende local cu ta uzando,por ehempel, Ingles pa comunica cu otro,entre otro via Facebook, ye ta haya cu esey lo por ta un peliger pa nos idioma crioyo. Nos mester percura pa nos lenga pasa di un generacion pa otro. Si esaki sosode, nos idioma Papiamento lo keda bibo.

Papiamento na scol

Sr. Todd Dandaré ta reitera su ponencia cu e factor cu mas por yuda existencia di Papiamento ta su uzo na scol.  “Ainda nos no tin nos idioma manera debe ser na scol”, el a bisa.

E linguista a remarca cu casualmente directora di Unesco a reafirma su ponencia durante e discurso cu el a tene relaciona cu Dia Internacional di Lenga Materno. E ehecutivo di e organisacion mundial aki a haci enfasis cu un mucha mester haya su enseñansa den su propio idioma prome, y despues e por siña otro idioma. Esaki ta nifica, pues, cu enseñansa den su propio idioma prome hamas lo por strob’e pa siña otro idioma, sino al contrario.

“Te aworaki ni Hulandes, ni Ingles, ni Spaño nota e prome lenga general di nos poblacion. Nan t’ey si, y ta bon cu nan t’ey tambe, pasobra asina nos ta siña cuater idioma y nos ta biba den un comunidad multilingual y multicultural. Pero Papiamento y cultura di Aruba ta bin na prome luga”, el a bisa. Ya cu Papiamento ta e prome idioma di e gran mayoria di e poblacion aki y cultura di Aruba ta e fundeshi di bida riba e pida baranca aki.

El a trece cu preocupacion cu apesar cu Papiamento ta bibo, e tin su retonan. Un di nan ta cu si nos no tene cuenta cu introduccion di Papiamento na scol como lenga di instruccion ta di importancia vital pa e idioma, pa nos muchanan en particular y pa nos poblacion en general, poco poco, cu e influencia grandi cu aworaki tin di Ingles, e por bay perdi. Aunke ainda e peliger aki no ta uno puntual, nos mester tene cuenta cune, pasobra e ta latente si.