Como proyecto ‘C7’ registra bou ‘SFB 833’, asina ta identifica e proyecto di Eberhard Karls Universität Tübingen (Alemania) cu ta investiga aspecto verbal y nominal entre lexico y gramatica di nos dushi Papiamento, compara cu otro lenganan.

Pa compila informacion aki a asigna e Linguista, Maria José Gallucci, kende ta traha como assistent den e team di investigacion aki. Gallucci tin un doctorado den Hispanismo na Universidad di Zaragoza. Ultimo tempo el a establece su mes na Tübingen como parti di e programa Erasmus y un beca di investigacion otorga dor di DAAD (German Academic Exchange Service).

Investigacion
Gallucci a splica cu, pa medio di e investigacion aki, nan kier analisa e variacion ‘diatopico y diacronico’ aspecto verbal y nominal; kier men den sustantivo y verbo den diferente lenga, romance, como tambe den lenganan crioyo basa den romance.

Nan atencion principal ta poni den e interaccion entre gramatica y lexico. E proyecto C7 lo samina dos dominio di aspecto estrechamente relaciona: E dominio verbal, caminda nan lo pone atencion riba ‘imperfectividad y progresividad.’ El a bisa cu tambe nan lo pone extra atencion na e perifrasis verbal progresivo.

Mientras cu e di dos dominio lo ta e dominio nominal. Eynan nan lo samina e interaccion entre e aspecto nominal y e clase lexico particular di obheto ‘superordinado.’ Kier men, sustantivo den masa, situa entre e sustantivo y e sustantivonan den masa. Pues cosnan linguistico riba tereno cientifico di investigacion di lenganan. Den poco palabra, Gallucci a bisa cu e investigacion aki lo contribui pa conoce mas con Papiamento ta funciona den relacion cu e otro lenganan cu nan ta bay compara.

Papiamento y gradicimento
Dicon Papiamento? El a bisa cu na Alemania nan ta masha interesa den e lenganan crioyo. Y nan ta interesa pa sa mas di nos Papiamento y no e Papiamentu di Corsou, ya cu nan ta haya cu mester mas informacion di nos lenga crioyo, compara cu otro lenganan.

El a haya un impresion positivo cu nos hendenan ta gusta cu e Papiamento por bira materia di estudio internacional. Esaki a facilita e trabou, ya cu e hendenan tabata masha receptivo cu un encuesta cu el a realisa na Aruba. Nan a pone comentarionan entre otro manera ‘masha interesante’ y ‘hopi exito.’

Durante su permanencia di casi dos siman na Aruba, Gallucci a tene contacto cu diferente profesional y instancianan cu tin di haci cu nos lenga materno. Pero tambe a haci uzo di un cuestionario of encuesta como parti di su instrumento di investigacion. A realisa tambe reunionnan informativo na Savaneta, Noord, Santa Cruz y San Nicolas.

Danki na e colaboracion di personanan y instancianan, el a logra compila 150 encuesta ariba papel y 130 via on line. Igualmente el a realisa un serie di grabacion, alrededor di 21 grabacion. Ya caba nan tin algun resultadonan preliminar y unabes cu nan lo bin cla, nan lo divulga y comparti e resultadonan di e investigacion aki.

E investigacion aki ta dirigi pa e profesornan Dr. Sarah Dessì Schmid y Dr. Wiltrud Mihatsch di e seminario di lenga Romanico na Universidad di Tübingen. E team di investigacion den e proyecto aki ta integra pa Charlotte Coy, Désirée Kleineberg, Lydia Momma y Alexandra Schuster.

Na final, Gallucci a menciona un lista largo di gradicimento. El a expresa palabra di danki na e linguistanan di Papiamento, Ramon Todd Dandaré y Joyce Pereira, kende nan ayudo y colaboracion tabata fundamental pa e investigacion aki.

Tambe el a manda palabra di gradicimento na Biblioteca Nacional Aruba y su personal kende nan incluso, e por a graba varios di nan durante e lesamento di tres historia na papiamento. Na Anna María Proveyer-Groot, di Departamento di Enseñansa Aruba, Universidad di Aruba, Fundacion Lanta Papiamento, Fundacion Pro Persona cu dislexia, entre otronan.