Papia un cos… Despues haci otro…

Awor cu e acuerdo cu Hulanda ta un hecho, nos por hala rosea alivia pa varios motibo. Esun mas importante ta cu Hulanda lo continua cu e ayudo cu nos mester, sigurando asina cu e parti di poblacion cu a keda sin trabao ta keda haya ayudo alimentario, mientras esnan cu ainda a keda cu trabao, y tabata den duda si e subsidio di salario ta continua, por ta mas tranquil. Hulanda lo yuda mientras ta necesario, y e necesidad ey por dura te despues di otro aña, pasobra e pandemia no ta desaparece di un dia pa otro, y bolbe na nos ‘normalidad economico’ por bay dura varios aña.

Bisando esey, mester realisa si cu nos no por djis relaha awor y no haci nada mas. Manera nos propio Promer Ministro ta bisa, Hulanda no ta bin haci tur e trabao pa nos, ta nos mes mester hacie. Nos ta completamente di acuerdo cu esey; e Hulandesnan ta bin supervisa kico nos dirigentenan politico ta haci cu nan placa. Dificil pa kita nan razon, despues di e ‘track record’ cu nos mandatarionan ta mustra despues di 34 aña. Pero finalmente, ta nos mester drecha e cas den cual nos ta biba.

Si nos por tuma como punto di salida cu e actual gobierno tambe ta kere cu mehora gobernacion ta e mihor opcion pa nos tur, anto ta surgi e pregunta ta ki dia nos ta cuminza cu esey? Pasobra loke nos ta mira sucediendo, no ta duna indicacion di esey, al contrario. Den e edicion aki por tuma nota di e decision di Conseho di Ministro pa encarga cinco persona, cu aparentemente tabata trahando pa despacho di ministro encarga cu Salubridad Publico, pa bay maneha e transporte pa pacient sinta, entre otro pa pacient di dialyse. Den tempo di guera – financiero – aki nan ta haya un contrato pa cinco aña… y ta hiba cu nan “alle middelen”… Lastima cu nos no a haya e mandatario pa splica nos kico esey ta encera; nos por supone en todo caso nan salario, pero tin mas cos, medio di transporte talvez? Nos ta djis puntra…

Esey no ta tur. Si nan ta haya contrato pa bay haci esaki, por conclui cu nan no ta ambtenaar? Pasobra si nan ta ambtenaar ta dificil pa imagina cu nan ta laga nan posicion bay pa drenta den un areglo manera esaki, aunke nan ta keda por lo pronto, cinco aña, cu nan salario. Ademas, kico realmente nan tabata haci den e ministerio, si ta asina facil pa ‘get rid’ di cinco persona… bo no ta sinti nan falta, pasobra nan no tabata haci nada sustancial, o ta con e cos ta?

Pero tin mas aspecto cu merece splicacion. Por ehemplo, pakico e ministerio ta bay asumi un trabao cu pa tanto aña caba ta ser regla pa AZV como e organismo cu ta encarga cu pago di tur gasto cu ta relaciona cu salud publico. Kico ta e afan pa trece cambio den esaki? Nos ta corda ainda e comentarionan cu tabatin tocante e conflicto cu e director di AZV, cu finalmente a yega na un acuerdo mutuo pa termina e relacion di trabao, pero cu posiblemente tabatin algo di haci tambe cu e asunto aki? En todo caso, e decision ta tuma y ademas ta obvio cu henter Conseho di Ministro a bay di acuerdo cu esaki, pues no por bin bisa awor cu tabata un accion solitario di e mandatario di e cartera aki; nan tur ta carga responsabilidad pa un accion unico, cu ta cuminza kibra e principio cu tur gasto di salud publico ta bay pa AZV.

Ademas e ‘move’ aki ta yama otro pregunta: AZV lo mester bay paga DVG, cu ta keda encarga cu e gastonan di e servicio aki? Lo ta interesante pa tende di e mesun mandatario si AZV ta bay paga su ministerio o cu e ministro den su gran bondad a cuminza ‘austeriza’ den AZV di e manera creativo aki, cu naturalmente a keda cu e tarea pisa di austeriza cinco miyon florin pa luna. Esaki ta yuda un tiki, en todo caso. Consecuencia fastioso ta si cu di e manera aki e gastonan di e departamento ta bay subi, y esaki den tempo di austerizacion pa nan tambe.

Finalmente, cu gobierno como responsable final pa eventual deficit di AZV cada aña, esaki den sentido financiero e no ta haci diferencia. Unda si e ta haci diferencia ta cu asina aki, cu un solo decision di Conseho di Ministro, ta habri un trayecto pa cuminza atende cierto asuntonan di un manera ‘ad hoc’ unda no tin claridad mas ken ta haci kico y por cuminza practica esaki como un manera pa move placa, y move hende. E aspecto mas malo di e asunto aki ta cu e ta mustra e tipo di practica di patronahe politico, cu net nos a kere cu nos ta bay combati; al menos, scuchando e palabranan di nos promer mandatario, nos a kere cu ta den e direccion nos tabata bay.

Pregunta grandi cu no a bin dilanti ainda: nos por spera semehante inventividad di e otro coleganan cu tambe mester ‘get rid’ di hende for di nan ministerio pa cumpli cu Hulanda? Y mientras tanto, ta keda papia un cos, y haci otro?