Tempo ta bula. Ya ta un aña pasa cu nos a laga nos pensamentonan pasa riba e papel di prensa, na ocasion di Dia di Prensa, celebra riba 1 di september. Un dia special pa tur profesional di e sector aki, irespecto nan creencia, preferencia politico, o filosofia di bida. E aña aki e celebracion tin un tinte special, ya cu nos ta den pleno campaña electoral. Ademas den circunstancia special, mirando e problema di corupcion na nivel ministerial, algo cu no tin precedente den Reino den su totalidad. Esey ta trece varios responsabilidad cu ne pa prensa en general.

E ta haci e situacion mas interesante, cu hopi mas noticia pa procesa y comenta, pero tambe ta mustra riba necesidad di mas cautela. Den cayente di campaña prensa tin e tarea di informa, pero tambe pa anda cu cuidao pa no instiga innecesariamente contra ningun persona o entidad, ya cu esey no ta contribui na un ambiente pacifico cu nos mester pa tene eleccion na un manera debido.

Y cu esey ta necesario, nos por conclui caba for di algun incidente cu a tuma luga den cayente di campaña. Nan tabata innecesario, pero segun nos opinion tambe fruto di e maneho actual, cu tur evento riba caya ta permiti. Na cualkier rotonde riba e isla bo por keda stroba den bo cosnan di haci, pasobra tal o cual partido ta haya ta bon pa simplemente blokia caminda publico, molestiando tambe e ciudadano cu no kier tin nada di haci cu e partido ey, o cu partido politico en general, y kier nada mas cu nan por bay unda nan kier bay sin obstaculo di propaganda di partido, di cual hopi hende ta puntra nan mes si nan tin e debido permisonan pa haci esaki. Tin asunto cu e partidonan mes mester atende miho. Manera por ehemplo e coremento anochi laat den bario cu sound system na top, lubidando cu tin hende tin yiu chikito ta drumi, hende di edad cu kier sosega, etc. Nos no por imagina cu e tipo di actitud aki por gana voto, pa ningun partido.

Den ultimo aña nos por a ripara cu e influencia di e medionan digital a cuminsa profundisa mas ainda. Desde algun tempo nos corant a haya acompañamento di nos extension digital riba website y Facebook. Nos por constata cu satisfaccion cu tras di dos medio puramente digital, Bon Dia ta number tres den e medionan digital mas bishita, dilanti di otro medio digital cu ta liga na un corant. Nos ta satisfecho di por a logra esey den poco tempo, pero ainda falta…

Loke falta, ta informacion, informacion, informacion… Un di e asuntonan cu mas nos ta sinti su falta, ta transparencia den informacion di gobierno, na prensa y na e ciudadano en general. Lamentablemente Aruba ta keto bay bibando den e era di arogancia di esun cu ta goberna, cu ta loke nan kier duna na informacion, esey bo por haya. Esaki no por keda asina. Mester cambia esaki pa un politica fiho unda ta defini tur loke ta bay pa prensa (y comunidad). Y mester conta pa tur medio di comunicacion por igual. Y no manera e ta awor, cu e medionan comprometi cu gobierno ta haya informacion cu no ta na disposicion di tur hende y por uza esaki pa prepara un miho defensa di e causa comun, esta e bienestar di e gobierno di e momento ey. Nos ta bisa esaki cu enfasis, pasobra den pasado cu gobierno di otro signatura tambe esaki tabata sucede.

Pero si nos kier haci un cambio positivo, anto nos mester boga como sector di comunicacion den su totalidad pa proximo gobierno, cualkier cu e ta bay ta, cuminsa cu un maneho nobo unda ta habri tur informacion cu no ta secreto di estado, pa motibo di siguridad nacional, y pone esaki na disposicion di un y tur. Esun cu kier defende gobierno a base di e informacion, laga nan hacie, ta nan opcion. Esnan cu kier critica gobierno a base di mesun informacion, laga nan hacie, esey ta democracia.

Pero no por sigui tolera e situacion unda gobierno ta hinca mas esfuerso den sconde cos, compara cu loke nan ta hinca den recurso pa duna comunidad informacion corecto, al caso, suficiente y na tempo.

Kico asina ta e cosnan cu por mehora, concretamente? Por ehemplo, y treci dilanti varios biaha caba: informacion tocante entidadnan liga na gobierno cu mester duna nan relato y cuenta anual pa tur ciudadano por tuma nota di con nan ta anda. Con por ta posibel cu gobierno mes mester duna cuenta y ta hacie tambe, aunke no perfecto, anto nos mester biba den un misterio ta con empresanan estatal ta opera. Nos mester por averigua cu loke nan ta cobra nos na tarifa pa e servicio cu nan ta duna, ta hustifica of no. Te awe, den ningun debate, salvo un o dos excepcion, nos no ta tende di e partidonan un contesta cla ta con nan ta bay habri comunicacion y kita e inhusticia aki for di caminda. Ta di spera cu aki un aña nos tin miho noticia riba esaki.