Papa Francisco a recientemente nenga di retira e Arzobispo Philippe Barbarin (68) for di su puesto na Lyon. Barabarin a keda sentencia dia 7 di maart pa un castigo condicional di prizon pa 6 luna. Despues di e sentencia, Barbarin a entrega su retiro como e Cardinal di Lyon.
E sentencia ta bin na raiz cu corte ta di opnion cu Barbarin no a haci suficiente pa proteha muchanan di ser abusa sexualmente. Durante añanan 80 y 90, un pastor di e bisdom di Barbarin lo a comete e acto aki contra algun decena di mucha. E sentencia a bin di sorpresa pa e Bisdom Catolico ya cu mayoria caso a ‘verjaar’ y e acusado prinicipal a apela pa wordo declara liber di acusacion. Barbarin mes a apela su sentencia pero no obstante esaki a entrega su retiro.
Sinembargo, Papa Francisco ta wak e caso diferente y no ta convenci cu Barbarin ta culpabel. Durante un bishita na e Vaticano, e Arzobispo Barbarin kende ta di origen Frances a haya di tende cu e Papa no ta acepta su retiro. Locual si e Papa a haci ta pidi Barbarin pa haci ‘locual cu e ta haya ta ta miho pa e bisdom’, un vocero di e Vaticano a confirma. Na e momento aki Barbarin ta tuma un distancia temporario di su encargo, pero pa cuanto tempo no ta conoci.
