(AFP)—Papa Francisco a regresa na e Vaticano diadomingo despues di e ser descarga for di hospital unda el a keda casi cinco siman ta hayando tratamento pa problema respiratorio, pero a tuma e tempo prome cu su despedida pa gradici simpatisadornan pa nan apoyo.
Cu un aparencia di cansa, e pontifice tabata sinta den rolstoel riba balcon di hospital pa bisa ayo, mandando un saludo na centenares di hende cu a reuni abao pa desea e cabes di e Misa Catolico un recuperacion completo.
Peregrinonan a canta su nomber durante e prome bista di Francisco desde 14 di februari, ora a admiti’e pa e hospital Gemelli na Roma cu problemanan respiratorio y un malesa respiratorio cu a desaroya den neumonia.
“Danki tur hende,” un Francisco ainda fragil a bisa den microfon, mientras e tabata zwaai man y mustra su duimnan ariba punta.
Esaki ta e Papa su di cuatro estadia den hospital desde su eleccion na 2013 y esun di mas largo. Fracisco, ken a kita un parti di su pulmon den su infancia, ainda ta enfrenta un recuperacion largo di al menos dos luna.
E estado fragil di Francisco su salud a causa speculacion si e lo retira y habri porta pa un sucesor, manera su predecesor Benedicto XVI a haci.
Un periodo di descanso
E Papa a sufri di varios crisis respiratorio durante su estadia den hospital, cual a causa dokternan pa conduci broncoscopia pa kita secrecion for di su pulmonnan y conduci transfusion di sanger.
E seriedad di su condicion a ser subraya pa e publicacion dia 6 di maart di un grabacion di e Papa den cual—papiando den un bos zwak—a gradici su simpatisadornan resando p’e. Francisco a sigui traha den hospital ora tabata posible, pero su equipo medico a clarifica cu e no lo participa den eventonan publico ainda.
“Ainda mester mas progreso na cas, pasobra un hospital—hasta si esaki ta zona straño—ta e pio luga pa recupera pasobra e ta unda bo por contrata mas infeccion,” segun un di su dokternan, Sergio Alfieri, a conta reporteronan ayera.
“Durante su periodo di descanso e no lo por tuma parti den afspraaknan diario,” el a bisa.
Mirando e estado di e Papa, preguntanan ta keda den aire di ken lo lidera e cronogram di eventonan religioso den periodo di Pasco Grandi—e periodo mas santo den e calendario Cristian.
Ora reporteronan a puntra tocante e speculacionnan cu e Papa por retira, secretario di Estado di e Vaticano, Pietro Parolin, a contesta” No, no, no. Absolutamente cu no.”
