Diabierna Vaticano y Papa Francisco a mustra nan preocupacion pa e situacion cu Venezuela ta pasando aden. Papa Francisco a haci yamado na gobierno di Nicolas Maduro, pa suspende e Asamblea Constituyente, cu ta aumenta e “clima di tension y ta hipoteca futuro”.
Den un comunicado, secretaria di estado di Vaticano a lamenta e crisis na Venezuela, cu ta dia pa dia mas radical y grave. Den e comunicado nan ta splica cu Papa Francisco “ta sigui di cerca e situacion na Venezuela y su conflicto humanitario, social, politico, economico y hasta spiritual”.
“Santa Sede ta mustra su preocupacion pa radicalisacion y grave situacion di crisis na Republica Bolivariano di Venezuela, y pa e aumento di hopi morto, herido y persona deteni”, comunicado a bisa.
Comunicado ta pidi sigura e reconocemento di derecho humano y di libertad fundamental di nan ciudadano. Nan a pidi tambe pa evita iniciativa manera Asamblea Constituyente nobo, cu ta aumenta e clima di tension y enfrentamento, y no ta busca reconciliacion y paz entre Venezolanonan”.
Finalmente iglesia catolico a haci un yamado na forsanan militar pa sigura y cuida e poblacion y no continua cu uso excesivo di violencia.
Varios personalidad publico a solicita na Papa Francisco y pa iglesia catolico pa un pronunciamento riba situacion cu Venezuela ta bibando aden, entre nan tin e cantante José Luis Rodríguez ‘El Puma’.
