Papa Francisco a denuncia e “locura homicida di terorismo fundamentalista”, dilanti di cuerpo diplomatico cu ta acredita na Vaticano. El a solicita tambe accion balente pa teritorio manera Siria y Venezuela. Na su tradicional discurso di inicio di aña y dilanti di representante y embahador di 182 pais cu ta acredita na Vaticano, Papa Francisco a analisa e situacion di mundo y tur conflicto y problema cu ta preocupa actualmente. Durante su discurso cu tabata dedica na seguridad y paz, Francisco a denuncia e terorismo di matriz fundamentalista, cu a produci hopi victima rond mundo y cu ta abusa nomber di Dios pa causa morto na su nomber.
Francisco a bisa cu terorista di matriz fundamentalista ta relaciona cu hopi victima rond mundo manera: na Afganistan, Bangladesh, Belgica, Burkina Faso, Egipto, Francia, Alemania, Jordania, Irak, Nigeria, Pakistan, Merca, Tunez y Turkia. “E terorismo fundamentalista ta e resultado di miseria spiritual”, el a afirma. Francisco a yama tur diplomatico rond mundo pa lucha pa logra paz na Siria, na Oriente Medio y a solicita un accion balente na fabor di paz y dialogo na Venezuela, pasobra el a recorda cu alegria e acuerdo cu a logra na Colombia cu FARC, despues di un conflicto arma di 52 aña. “E mensahe aki ta busca di alcansa e confiansa entre dos banda, cuida caminda pa dialogo y e necesidad di un accion balente, lo cual ta urgente na Venezuela, pa motibo di henter e crisis politico, social y economico den cual poblacion ta”, el a bisa. Papa a solicita tambe un ricibimento generoso pa tur refugiado y emigrante, pasobra e accion aki ta un reto pa henter Europa dilanti di e crisis humanitario cu ta presenta awo. “Emigrante no ta un cifra, emigrante ta persona, cu un nomber, cu historia, cu famia”, Francisco a recorda.
