Panorama economico positivo… Problema structural no atendi…

Fin di aña 2024, tempo pa tira un vista riba con e aña a bay, pa despues haci mescos cu loke ta spera nos pa 2025. Primeramente e asuntonan economico general, cu ta mustra cu e crecemento economico fuerte di 2023 a continua, hasta di tal forma cu a surpasa e proyeccion anticipa pa e aña. Entre otro por mira den e cifranan di empleo, manera registra na Banco di Seguro Social (SVB), unda e cantdidad di empleo entre januari 2023 y januari 2024 a aumenta cu 5,2%, mientras empleo entre december 2023 y december 2024 a mustra un aumento di 11,5%. Na inicio di december 2024 e registro di SVB tabata conta cu 46.182 empleo, mientras na e punto mas abao di registracion di empleo, na februari 2021, empleo tabata na 39.288, un diferencia di 6.894 cupo di trabao, cu ta ilustra unda nos tabata y unda nos ta bayendo awor. E cifranan di empleo aki ta mustra riba un posible crecemento fuerte di economia e aña aki, talvez mas fuerte cu na 2023, aunke Banco Central di Aruba den su relato mas recien ta anticipa un crecemento nominal di GDP di 10,0%, un poco menos cu e 11,4% calcula pa 2023. E noticia ta bira mas modera pa 2025, cu 2,1% di crecemento nominal di GDP, principalmente pasobra contrario na 2023 y 2024, menos inversion den construccion, pa via di proyecto grandi kedando cla. Pa completa e panorama a mas largo plazo, Banco Central ta proyecta un GDP real di 2,9% na 2026, 2,6% na 2027 y 2,2% na 2028.

Esaki kier bisa anto cu nos lo tin algun aña bon nos dilanti? Si bo ta limita bo mes na solamente mira e parti estrictamente economico, bo por kere esey. Pero un vistazo un poco mas amplio riba loke ta sucediendo rond di nos ta mustra tambe e riesogonan presente. Pa cuminza, e panorama internacional. Na Merca dentro di poco siman lo tin un otro presidente na mando, cu a expresa un cantidad di asunto cu por resulta perhuicioso pa economia Mericano y mundial. Un posible guera di tarifa di importacion cu China, Canada, Mexico y hasta cu Europa lo por conduci na un aumento barbaro di prijs di practicamente tur cos, loke pa nos cu ta depende casi 100% di importacion, lo ta catastrofico. Nos tin caba un nivel haltisimo di principalmente prijs di cuminda, aunke segun estadistica oficial inflacion durante e aña aki tabata bahando. Esey por ta e caso, tumando na cuenta tur factor cu ta determina e indice di prijs (CPI), pero no ta loke e consumidor, y sigur esnan di menos recurso, ta mira ora bay haci compra.

Pero e panorama internacional por hasta bira mas complica ainda. E guera entre Ucrania y Rusia no necesariamente lo conoce un tregua, a pesar cu e presidente electo Mericano a priminti di regla paz den 24 ora, algo cu e mes no por ta kere. Su expresionnan for di sla tocante Canada, Mexico, Panama y Greenland ta aumenta e impresion cu ta dificil pa predeci den ki direccion maneho di gobierno lo hiba nan pais, y de paso nos economia tambe. Un aspecto importante di e posible guera di tarifa por ta un golpi fuerte pa poder di compra Mericano, loke por afecta e fluho di turista cu nos a mira den ultimo par di aña den e recuperacion economico despues di e pandemia.

Ademas di e sucesonan internacional nos no por keda sin contempla loke ta pasando den nos pais, cu tin influencia riba nos desaroyo socio-economico. Cu turismo ta bayendo ‘viento en popa’ ta solamente mitar di e realidad. Nos por aprecia cu den discurso di Pasco nos Gobernador a menciona e riesgonan cu ta surgi di “e desaroyo urbano a costo di nos naturalesa, ki cambio climatico lo tin pa nos isla”, entre otro preocupacion mas. Nos aprecio ta grandi pasobra te no mucho dia pasa, gobierno ainda tabata ataca tur activista cu tabata declara, cu nan derecho, nan opinion contra e actual exageracion den desaroyo di turismo, como casi ‘enemigo di estado’.

Ademas, e problema no ta limita na e destruccion excesivo y innecesario di naturaleza. E otro ‘yaga’ grandi ta e dos centronan urbano cu ta sufri di pudricion di paden, mientras e busqueda di urbanizacion den e areanan di naturaleza ta continua; un fenomeno cu a surgi rond mundo, pero tin pais cu a busca un solucion pa esaki. Tabatin eleccion recientemente pero pa bisa cu nos a scucha o lesa di algun plan coherente di urbanizacion responsable, orienta riba rehabilitacion di e casco urbano di Playa y San Nicolas, cu debido atencion pa creacion di vivienda den e areanan aki, esey simplemente no tabat’ey.

Y esey, segun nos, pa un motibo simple: e partidonan politico no tin segun nos un ‘clue’ kico realmente e tarea inmenso aki ta encera. Nan no ta yega mas leu cu un par di lema barata, sin mishi cu e curazon di e asunto. Nos problema no ta pa crea mas empleo, nos tin mas cu nos por maneha awor y den e proximo añanan. Nos problema ta cu nos mandatarionan aparentemente ta kere cu bo por maneha un isla cu dentro di 15 aña por tin 140.000 pa 150.000 habitante, sin cu tin vivienda suficiente awor caba… Di tur e problemanan cu ta bin cu e crecemento aki, nos a tende un politico dedica un palabra na esaki? Asina malo nan ta na altura di loke ta spera nos, o nan ta scoge pa keda keto?