Un comision di inteligencia artificial lidera pa ex-CEO di Google, Eric Schmidt, ta urgiendo Merca pa reforsa su habilidad di AI pa contraresta China, incluyendo invencion di arma ‘podera pa AI’, algo di cual Google mes a keda leu pa motibonan di etica.
Schmidt y ehecutivonan actual di Google, Microsoft, Oracle y Amazon ta entre e 15 miembro di Comision Nacional di Seguridad riba Inteligencia Artificial, cu a revela su reporte final na Congreso dialuna. “Pa gana den AI nos mester mas placa, mas talento, liderazgo mas fuerte”, Schmidt a bisa dialuna.
E reporte ta bisa cu mashin cu por ‘percibi, dicidi, y actua mas rapidamente’ cu humano y cu mas precision lo ser lansa pa propositonan militar – cu of sin participacion di Merca y otro democracianan. Ta adverti contra uso sin regulacion di arma autonomo, pero ta expresa oposicion na un prohibicion global.
Tambe ta yama pa ‘restriccionnan sabi’ di e uso di hermentnan di inteligencia artificial (AI na Ingles) cu por ser usa pa vigilancia masivo. “Nos mester desaroya tecnologia cu ta preserva nos balornan occidental, pero nos mester ta prepara pa un mundo den cual no tur hende ta haciendo esey”, segun Andrew Moore, un comisionado y cabesante di Google Cloud AI.
E grupo tin e atencion di legisladonan top di ambos partido, pero a genera critica pa inclui cantidad di miembro cu ta traha pa compania tecnologico cu contractnan gubernamental grandi, y cu asina tin hopi den wega den reglanan federal pa tecnologia emergente.
E reporte ta propone ‘strategia lidera pa Cas Blanco’ pa defende contra menasanan relaciona cu AI, pa pone standard riba con por usa mashin inteligente di forma responsabel, y pa reforsa investigacion y desaroyo Mericano pa mantene e bentaha tecnologico di e nacion riba China.
“Nos ta kere nos ta un of dos aña dilanti di China, no cinco of 10”, Schmidt a bisa e Comite di Servicionan Arma di Senado siman pasa. El a clarifica dialuna cu e tabata expresando su opinion personal y no necesariamente esun di e comision.
Ainda no ta cla si administracion di Joe Biden ta abordo cu e maneho di e comision. Ainda ta wardando confirmacion di un director nobo pa Oficina di Cas Blanco di Politica di Ciencia y Tecnologia, cual Biden a eleva na un posicion di nivel gabinete.
“Politica di AI usualmente ta hopi bipartisano”, segun Michael Kratsios, kende tabata CTO Mericano bao presidente Donald Trump y a lidera un empuhe pa pone mas recurso pa desaroyo di AI den agencianan federal. E imperativo mas grandi, e ta bisa, ta pa ‘e proximo gran tecnologia AI wordo desaroya den occidente’.
Un diferencia grandi entre e dos administracionnan probablemente ta bay ta e maneho pa construi talento AI. E comision ta recomenda un politica di inmigracion mas habri cu loke Trump tabata preferi.
Congreso a forma e panel AI na 2018 y a nombra 12 di su 15 comisionado, cu otronan scogi pa secretarionan di Defensa y Comercio di Trump. Un hues despues a obliga e comision pa haci su reunionnan y registronan mas accesibel na publico despues cu un grupo di libertad civil, Electronic Privacy Information Center, a reta su secresia.
E ta lidera pa Schmidt, kende tabata CEO di Google y despues presidente ehecutivo di su compania mama Alphabet. Anteriormente el a yuda crea e Defense Innovation Board, cu ta conseha Pentagono riba tecnologia nobo.
Esaki a trece conflicto na 2018, tempo cu Google a sostene Project Maven, un iniciativa di ehercito Mericano usando tecnologia di vision di computer basa riba AI pa analisa video di drone den zonanan di conflicto. E compania, respondiendo na activismo interno di empleadonan, tambe a priminti di no usa AI den ningun aplicacion relaciona cu arma.
“Mi no tabata di acuerdo cu e decisionnan di Google riba Maven”, Schmidt a bisa senadornan siman pasa, yamando esaki un ‘aberacion’ compara cu e industria tecnologico den su totalidad, unda e ta bisa tin cantidad di compania cu kier traha cu ehercito. El a bisa cu sistema AI y di vision di mashin ta particularmente bon pa ‘vigila pa cosnan’, algo cu ehercito ta pasa hopi tempo ta haci.
E comision tambe ta inclui ehecutivonan manera Safra Catz, CEO di gigante di software Oracle, y CEO entrante di Amazon, Andy Jassy, kende actualmente ta maneha su division di cloud computing, como tambe expertonan top den AI na Microsoft y Google. Tur cuatro compania a competi contra otro pa contract federal di cloud computing. E representantenan di Microsoft y Google a join otro miembronan den aprobacion di e reporte final dialuna, pero a abstene di e seccion relaciona na asociacion di gobierno cu sector priva.
Exclusion di gruponan di derechonan humano y expertonan tecnologico for di e comision a conduci na e grupo mas facilmente marcando e asunto di politica aki como un competencia ‘democracia vs. autoritarianismo’, contra China , mientras ta evadi topiconan dificil manera e uso di tecnologia AI na e frontera Merca-Mexico, segun Jack Poulson, un ex-investigado di Google cu awo ta dirigi e vigilante di industria Tech Inquiry.
“E motibo nominal pa tin e CEOnan tecnologico den e comitenan aki ta cu nan ta expertonan den tecnologia. Pero tambe, suheto na rekisitonan di accionista, actua den interes di nan compania”, Poulson a bisa. “Nan no kier regulacion significante ni cumplimento anti-competencia.”
E asociacion gobierno-industria por ta importante pa Merca y su aliadonan pone standard pa e uso responsabel di AI, segun Megan Lamberth, un investigado asocia na Centro pa un Seguridad Mericano Nobo. “AI tin potencial pa transforma berdaderamente no solamente e forma con ehercitonan ta bringa un guera, pero con economianan ta opera y con sociedadnan y hende ta interactua cu otro”, Lamberth a bisa. “Si tin un gap den liderazgo, otro pais ta bay yena e bashi ey.”
Union di Libertad Civil Mericano a bisa den un declaracion dialuna cu e comision a haci recomendacionnan util pero mester a bay mas leu estableciendo proteccionnan pa derechonan civil awo, prome cu agencianan di inteligencia y ehercitonan lansa sistema AI ampliamente.
E comision a pidi Congreso pa traha leynan nobo rekeriendo agencianan federal pa ehecuta evaluacion di derechonan humano di sistemanan di AI nobo usa riba Mericanonan. Pero no a recomenda e limite obligatorio riba vigilancia cu activistanan tabata busca.
