(AP) — Un comite congresional a lansa un investigacion riba e promotor di e festival musical Astroworld na Houston, den cual 10 persona a muri durante movecion den e multitud y e publico tabata asina preta cu hopi no por a hala rosea of move nan brasa.
House Oversight and Reform Committee a manda un carta ayera na presidente y CEO di Live Nation Entertainment Inc., Michael Rapino, solicitando informacion tocante e rol di e compania den e festival dia 5 di november y concierto di strea di rap, Travis Scott.
Informacion solicita pa e comite ta inclui detayenan riba seguridad, control di multitud y plan pa incidente di casualidad masivo; detayenan tocante cualkier informacion pre-show di Live Nation of su subsidiarionan riba preocupacionnan pa seguridad expresa prome cu e concierto; y ki stapnan e promotor di concierto ta bay tuma pa preveni lesion of morto na eventonan futuro.
“Reportenan recien ta lanta preguntanan serio riba si bo compania a tuma e stapnan adecua pa sigura seguridad di e 50mil persona cu a atende e Festival Astroworld”, e comite a bisa den e carta.
E comite ta solicita pa Live Nation duna documentacion riba e preguntanan pa dia 7 di januari, y pa tene un sesion informativo cu miembronan di e comite pa dia 12 di januari. Un audiencia asina na e comite lo ta tras di porta cera y no habri pa publico.
Siman pasa, oficialnan a anuncia cu hende a muri di e concierto pa asfixia di compresion. Un experto medico ta bisa cu e presion di e movecion di e multitud na e evento tabata asina grandi cu rapidamente a saca tur aire for di pulmon di e victimanan, pa loke nan a bay fo’i tino dentro di un minuut y a muri pasobra organonan critico, manera curason y cerebro, a keda sin oxigeno.
