Un tribunal di El Salvador, na Centro-America a condena 7 pandiyero na 390 aña di prizon, pasobra ta acusa nan di un masacre di 11 trahador, cu a tuma lugar na luna di maart 2016, un fuente oficial a informa. Fiscalia general di Republica di El Salvador a celebra via su cuenta di Twitter cu Husgado specialisa di sentencia a condena 7 hende, cu un condena di 390 aña di prizon, pa nan participacion den e caso di masacre di San Juan Opico.
Ley di El Salvador tin un maximo pa condena den prizon di 60 aña. E sentencia ta inclui 35 aña di prizon pa cada un di 11 victima y cinco aña mas pa acto ilegal, pa cada un di e integrantenan di e pandiya Barrio 18, e tribunal a splica. Otro dos mucha menor a haya condena di 15 y 5 aña di prizon den un centro di internamento di hoben pa mesun crimen, riba dia 24 di october cu a pasa. E masacre aki a preocupa henter poblacion di El Salvador, y e suceso aki a tuma lugar 3 di maart di 2016 na e comunidad rural Agua Escondida, na 30 kilometer pa nort di capital San Salvador.
E pandiyeronan a tende nan condena via un videoconference desde prizon. Durante e huicio un di nan a splica cu nan a comete un eror, y nan a mata e grupo di 11 persona pa un kibocacion, pasobra nan tabata busca hende di otro pandiya rival.
Den prueba cu fiscalia tin pa culpa e suhetonan di Barrio 18 tin un video cu polis a tuma for di un di persona cu ta envolvi den e crimen. E video ta mustra e manera con nan a comete e masacre. Despues di e crimen gobierno a cuminsa cu medidanan di seguridad fuerte y a suspende bishita na 6 prizon cu tin mas di 16 mil pandiyero.
