(AP) – Un dato mas a surgi di e pandemia di COVID-19; Aparentemente e ta sigur pa relaha e restriccionnan poni riba di methadone, cual ta e tratamento mas bieu y controversial pa adiccion di opioide.

Aña pasa, den bista cu coronavirus a para henter e nacion, e gobierno a bisa clinicanan di methadone cu nan lo autorisa pa e pashentnan cu ta stabil bebe nan medicina na cas sin supervision.

Investigacionnan haci na e comienso di esaki a duna resultado cu ta bisa cu esaki no a causa aumento den sobredosis di methadone, ni tampoco benta ilegal di esaki. Y cu e terapia duna via di telefon cu tabata mandatorio cu e autorisacion di medicina na cas, a traha hopi mas miho pa algun persona, yudandonan keda den recuperacion y sigui dilanti cu nan bida.

Oficialnan di salud Mericano ta studiando e cambionan, e impacto y con nan no lo por ser continua.

Desde aña 1970, reglanan estricto y rigido tabata e guia di tratamentonan cu methadone, rekiriendo mayoria di e personanan aki pa para den rij y tuma e medicina likido, bebiendo esaki for di copinan, mientras cu e empleadonan ta keda cu bista riba nan na e clinica. Solamente pashentnan di termino largo tabatin permiso di bay cu dosis di mas di un dia cas.

Aworaki, cientificonan ta reuniendo informacion pa pone e reglanan aki, cual nunca a ser someti na testnan rigoroso, bao di critica.

“El a rekeri un pandemia pa cambia e clima, pa por duna nos e oportunidad di studia esaki,” segun Dr. Ayana Jordan di Yale University School of Medicine, ken ta entre e investigadonan cu ta trahando riba di e cambionan pa cu e cambio di e reglanan di methadone. “Si nos bolbe tuma e polisanan aki bek despues di COVID, e lo ta dificil pa hopi di e personanan aki.”

Mas di 400,000 hende den Merca ta ricibi methadone como parti di nan tratamento pa addicion na opioide manera heroina, fentanyl, y pildonan pa kita dolor. Methadone, cual tambe ta un opioide, por ta peligroso den cantidadnan grandi, pero ora di tuma esaki di un manera corecto, e por para e gana di droga sin causa e efecto di ta bao di e influencia. E hendenan aki por mantene un trabao y por sigui reconstrui nan bida.

Scott Mancini, di 58 aña di edad, un chofer di truck retira den Providence, Rhode Island tin desde aña 1989 ta tuma methadone pa un adiccion di heroina. Prome cu e cambio di pandemia, como pashent di largo termino ken tabata sigui e reglanan, e tabata por a tuma dosis pa 6 dia cas, cu un bishita pa siman na e clinica.

“Bo ta sinti bo mes mara,” Mancini a bisa di e sistema bieu. Awo, cu dosis pa 28 dia na cas, e por disfruta di un biahe largo of bishita na su famia.

“El a traha hopi bon pa mi persona y pa hopi otro hende,” Mancini a bisa. “Mi ta kere cu ta tempo pa nos cambia e reglanan pa cu e programanan aki den henter e pais, pa motibo cu e reglanan aki tin aña largo sin cambia.”

No ta tur clinica di methadone a los e reglanan, pero Rhode Island su programa mas bieu, CODAC, unda cu Mancini ta un pashent, a bula na e oportunidad di usa terapia via di telefono y ricibi mas dosis pa hiba cas. Den un cuestionario pa pashentnan condudci pa Brown University, mayoria di hendenan a bisa cu e terapia via di telefon a yuda nan.

“Tin dos cos cu nos a sina di COVID.” CEO Linda Hurley a bisa. “E cantidad di dosis pa por hiba cas no mester ta restringi di un manera asina severo, y ‘telehealth’ (cual ta ayudo pa salud via telefon) ta traha.”

Pa motibo di con opioidenan ta traha den e cerebro, hendenan cu ta depende di esaki ta bira malo si nan stop di usa esaki. E efectonan secundario di ora stop di usa esakinan por sinti manera un griep, severo, cu ansiedad, sodamento, insomnia y sciatica. E gana di bolbe usa e droga por bira asina intenso cu un recaida ta hopi comun. Methadone ta alivia tur e sintomanan aki.

E idea tras di e reglanan di e era Nixon tabata di preveni e benta ilegal riba caya y sobredosis.

“Mi ta compronde e preocupacion, pero tin manera di lidia cu e problemanan aki” manera e testnan di urina pa por sigura cu e pashentnan ta bebiendo nan dosis di methadone, segun Lyna Chaves di 37 aña di edad, biba na Pleasantville New Jersey.

Awo e ta ricibi dosis di methadone pa 5 dia di John Brooks Recovery Center bao di reglanan di e pandemia. Trahando pa por bira un specialista den sosten di pueblo, tambe e ta distribui cuminda di donacion, pasta di djente, y otro articulonan di cuido personal na personanan cu no tin cas.

Rutgers University tin plan di analisa New Jersey su datonan tocante salud pa cual aumento den sobredosis di methadone. Den entrevistanan cu investigadornan, New Jersey su proveedornan di methadone ta apoya e cambio den reglanan pa cu e dosisnan cu por hiba cas, segun investigado di Rutgers Stephen Crystal.

Hendenan cu ta biba leu di clinica y tin trabaonan fiho ta particularmente sinti fastioso y complica cu e biahenan diario na e clinica pa por ser supervisa ora di tuma un dosis, Crystal a expresa.

Na momento cu e gobierno a relaha e reglanan aki, el a bisa cu pashentnan stabil por ricibi dosis pa 28 dia pa hiba cas di methadone y esunnan menos stabil por ricibi dosis pa 14 dia. Clinicanan tabatin e derecho di delibera y dicidi cual tabata e pashentnan cu tabata cualifica pa esaki, hopi di nan a depende di nan experiencia y criterionan di gobierno anterior manera tempo den tratamento y ausencia di actividad criminal.