(AP) — Riba un isla chikito cerca di costa Caribense di Panama, como 300 famia ta empacando nan pertenencianan den preparacion pa un cambio dramatico. Generacionnan di Gunas kende a lanta riba Gardi Sugdub den un bida dedica na lama y turismo ta bay intercambia esaki e siman aki pa e tera firme di e continente. Nan ta bayendo boluntariamente – mas o menos.
E Gunas di Gardi Sugdub ta e prome di 63 comunidad na e costanan Caribense y Pacifico di Panama cu oficialnan di gobierno y cientificonan ta bisa ta spera di haya nan mes forsa pa realoca door di nivelnan di lama den proximo decadanan.
Un oficial cu ministerio di Vivienda Panameño a bisa cu algun persona a dicidi pa keda riba e isla te ora cu no ta safe mas, sin revela un cantidad specifico. Autoridadnan no ta bay forsa nan pa bay, e oficial a bisa, kende a discuti e asunto di forma anonimo.
Gardi Sugdub ta un di como 50 isla pobla den archipielago di teritorio Guna Yala. E ta apenas como 366 meter di largo y 137 meter hancho. For di ariba, e ta mustra como un oval rondona pa un decena di waf cortico unda residentenan ta mara nan boto.
Cada aña, specialmente ora biento fuerte ta bati lama na november y december, awa ta yena e cayanan y ta drenta e hogarnan. Cambio climatico no ta conduciendo solamente na un aumento den nivel di lama, pero tambe ta kentando ocean y pa e motibo aki, empoderando tormentanan mas fuerte.
E Gunas a purba di reforsa e borde di e isla cu piedra y coral, pero awa di lama ta keda bin.
Gobierno autonomo di Guna a dicidi dos aña pasa cu nan mester pensa di bandona e isla, pero e tempo aya tabata pasobra e isla tabata birando sobrepobla. Efectonan di cambio climatico a acelera e pensamento aki, segun Evelio Lopez, un maestro di 61 aña di edad na e isla. E tin plan pa move cu su famia na un sitio nobo riba e continente cu gobierno a desaroya pa un costo di $12 miyon. E casnan di cocnret ta sinta riba un red di caya saca for di e selva tropical un tiki mas di 2km for di e puerto, unda un biahe di 8 minuut riba boto ta transporta nan na Gardi Sugdub. Bandona e isla ta “un reto enorme, pasobra mas cu 200 aña di nos cultura ta for di lama, pues bandona e isla ta nifica hopi cos,” Lopez a bisa. “Bandona lama, e actividadnan economico cu nos tin aki riba e isla, y awo nos ta bay ta riba tera firme, den selva. Nos ta bay mira kico e resultado ta a largo plaso.”
Steve Paton, director di programa di monitoreo fisico di Instituto Smithsonian na Panama, a bisa cu e movida proximo ta “un consecuencia directo di cambio climatico door di aumento di nivel di lama.”
“E islanan en averahe ta apenas mita meter riba nivel di lama, y mientras e nivel ta eleva, tardi of trempan e Gunas ta bay tin cu bandona tur e islanan casi sigur pa fin di siglo of prome.” Paton a bisa cu tur costa di mundo ta afecta pa esaki na diferente velocidad.
Residentenan di un comunidad costeño chikito na Mexico a move na tera firme aña pasa despues cu tormentanan a continua destruyendo nan hogarnan. Gobiernonan ta haya nan mes forsa pa tuma accion, desde e ciudad di laguna, Venecia na Italia, te na e comunidadnan costeño di New Zealand.
Un estudio recien di directorado pa cambio climatico di ministerio di Medio Ambiente Panameño, cu sosten di universidadnan na Panama y Spaña, a calcula cu pa 2050, Panama lo perde como 2.01% di su teritorio na costa pa aumento di nivel di lama.
Panama ta calcula cu ta bay costa como $1.2 biyon pa reloca e alrededor di 38mil habitante cu ta bay enfrenta aumento di nivel di lama den termino corto y medio, segun Ligia Castro, director di cambio climatico pa ministerio di Medio Ambiente.
