Gobierno di Panama a anuncia cu lo reduci di 180 pa 90 dia e permiso di estadia na Panama, como turista pa ciudadano di Colombia, Venezuela y Nicaragua, den un politica di control di entrada y permanencia di stranhero.
“E medida ta busca reduci di 180 pa 90 dia e permiso di estadia como turista di tres pais, como tambe verifica si e turista tin ingreso y placa cu por certifica cu e ta drenta na Panama pa turismo,” Juan Carlos Varela, presidente di Panama a bisa.
E orden migratorio lo ser aproba proximo siman pa ministerio di seguridad, cu tambe lo continua cu mayor control riba antecedente penal di hende stranhero cu ta drenta Panama, Varela a splica. Autoridad di servicio nacional di migracion di Panama a detecta cu hopi stranhero a usa e figura di turista pa asina permanece na e pais, y despues di cumpli 180 dia, nan ta dicidi pa sali di teritorio Panameño pa un tempo cortico y despues drenta di nobo como turista atrobe.
E situacion aki a haci cu hopi Venezolano a keda deteni na luna di maart na e lugar conoci como Paso Canoas, na frontera entre Panama y Costa Rica, pasobra nan a tuma e oportunidad pa sali for di teritorio di Panama pa Semana Santa, pero despues autoridad a impedi e re-entrada di nan, ora cu autoridad a verifica cu e grupo di Venezolano aki tabatin varios entrada y salida como turista.
“E sistema di informatica cu ta usa pa mehora e control ta establece y determina, ora cu un persona tin varios salida y entrada, cu obhetivo di renoba nan 6 luna di turista. Ora e tempo a supera 6 luna, anto e stranhero mester solicita pa haya otro tipo di permiso cu por laga nan permanece den teritorio di Panama,” Alfredo Córdoba, comisionado di Servicio Nacional di Migracion na provincia Panameño di Chiriquí a splica.
Januari cu a pasa a bira vigente un decreto cu a crea varios visa di turista, como un rekisito pa persona cu tin permiso di entrada o residencia di pais di Europa, Merca , Canada y Australia.
