E recien electo presidente di Panama, Laurentino ‘Nito’ Cortizo, a sigura cu lo mantene reconocimento pa Juan Guaidó como presidente interino di Venezuela.
E mandatario a expresa ayera cu ta dispuesto pa ‘revisa e papel’ cu e Grupo di Lima tabatin den e buskeda di un solucion pa e crisis Venezolano, y ta sigura cu esey no a avansa hopi.
“Nos, na e momento aki, e Republica di Panama tin un relacion directo cu e gobierno di Guaidó. Esey ta respeta”, e presidente a afirma den un entrevista cu e television local, y el a agrega: “Mi ta aprecia hopi e esfuerso di e paisnan di e Grupo di Lima, hopi. Pero mi ta puntra mi mes cuanto nan a avansa. Nan a avansa pa e manera di yega na un acuerdo cu no ta exclui ni un hende? Eynan ta e pregunta” e presidente e electo, ex-minister, y ex-legislado di e Partido Revolucionario Democratico a bisa.
“E problema di Venezuela no ta solamente Maduro… tin otro factor, y si nos por yega y sinta na mesa, y cu tur sector lo sinta, Venezuela ta gana y e region ta gana, sin exclui, y tin algo di transicion tanten cu lo yega na un eleccion cu lo duna garantia pa e Venezolanonan, cu ta un pais grandi; mi ta sinti cu Panama den e sentido ey por contribui”, el a afirma.
E crisis Venezolano, caracterisa desde aña pasa pa escasez di productonan basico y remedinan, un historico hiperinflacion, destruccion di e aparato productivo y un insiguridad cu ta laga mas di 20.000 morto cada aña segun dato di ONG, a drenta den un etapa di agudizacion cu e asuncion di e di dos mandato consecutivo di Maduro, y e huramentacion di Guaidó como gobernante interino.
