Fiscal di Panama a formula denuncio contra 17 persona, kendenan ta involucra den delito di labamento di placa den un investigacion, cu tin relacion cu e pago di soborno di banda di Odebrecht, empresa Brasileño na pais di centro America Panama. Kenia Porcell, fiscal general di Panama a informa cu diamars cu a pasa, tur hende cu ta na condicion di acusado den caso aki, a ser yama pa declara den huicio. Medida aki a sucede despues di varios investigacion cu fiscal anti- corupcion a inicia na march di 2016, despues cu Suisa a solicita na Panama un asistencia hudicial pa nan investigacion desde pais Europeo ey tocante tur cuenta bancario cu ta relaciona cu Odebrecht.
Porcell a indica cu entre persona cu a ser acusa ta 8 empresario di Panama y cinco stranhero, hunto cu tres funcionario y un oficial di entidad bancario priva. Nan no a revela nombernan. “Ta un informacion reserva pasobra ta un proceso penal” porcell a bisa. Autoridad di Panama ta traha riba dos investigacion diferente cu Brasil y Merca tambe.
Departamento di husticia di Merca a bisa cu empresa Odebrecht ta e mas grandi contratista di Panama cu obra di mas di 9 mil miyon dollar. Asina mes a informa cu den 12 luna ultimo nan a paga mas di 59 miyon dollar na soborno entre 2010 y 2014, aña di gobierno di presidente Ricardo Martinelli.
