ORANJESTAD- Tur parti di mundo tin hende spanta pasobra nan nomber por aparece den e mega- scandal cu ta ser yama ‘Panama Papers’. Miyones di file di compania lanta na Panama pa evita o evadi pago di impuesto den otro pais a keda tira riba caya. Cantidad di celebridad den politica, deporte, farandula y comercio ta trata awor di splica ta pakico nan tin o tabatin un compania offshore na Panama, si no ta pa core pa impuesto den nan mes pais.
Sin duda, un dado momento lo menciona nomber di persona y empresa na Aruba tambe. Na e momento ey lo no ta conoci ainda kico realmente e compania offshore tabatin como funcion. Pasobra banda di e posibilidad pa uza un compania ‘offshore’ pa haci cos contra ley, manera labamento di placa, por haci uzo di un compania asina pa negoshi legal. Manera den tur asunto, ta na autoridadnan hudicial den cada pais pa determina ken ta violando ley y ken no.
Henter e asunto aki ta haci inevitabel cu nos ta papia tambe di e sector financiero offshore di Aruba mes. Un poco di historia: na 1988 a cuminsa funciona un tipo di empresa cu personeria huridico nobo, specialmente diseña pa fungi como compania ‘offshore’: e asina yama ‘Aruba Vrijgestelde Vennootschap’ (AVV). E nomber tabata referi na e hecho cu e exigencianan legal pa loke ta su administracion tabata hopi menos compara cu e tradicional ‘NV’. E compania aki, cu ta opera solamente pafo di Aruba, tabata paga pa su registracion aki na Aruba y tabatin un representante legal den forma di un trustkantoor, cu tin un licencia pa representa un AVV. Den e prome añanan e AVV a progresa bastante bon, yegando na un total di mas di 15.000 AVV registra den añanan nobenta.
Pero Aruba tabata relativamente laat den un wega cu tabatin hungado di mucho mas experiencia: Bahamas, Cayman Islands, British Virgin Islands (BVI), Bermuda, Panama y tambe nos hermana isla Curaçao, cu tabata den e sector aki desde Segunda Guera Mundial. Despues di aña 2000 e interes internacional pa haci negoshi via Aruba a bira hopi menos caba, y algun incidente grandi cu a capta atencion internacional a pone e reputacion di e AVV bao di luz negativo. Entre otro tabatin e caso grandi di labamento di placa via sector di aviacion na Peru na 2007, den cual segun autoridadnan hudicial di Peru un serie di AVV tabata envolvi. E caso no tabatin consecuencia hudicial na Aruba mes, pero e presion internacional pa limita espacio pa AVV a cuminsa caba. Poco tempo despues, na 2009, a sali e famoso rapport di Financial Action Task Force (FATF), cu tabata fatal pa e regimen suave cu Aruba tabata maneha pa e sector offshore, den su mayoria AVV, pero parcialmente tambe NV. A bin varios exigencia nobo, entre otro esun di deposita cuenta anual y copia di registro di accionista na Registro Comercial na Camara di Comercio. Esey a bay conta pa tur empresa, onshore y offshore. Pa e companianan offshore esey tabata significa mas documentacion obligatorio compara cu loke otro teritorionan tabata exigi y a pone e sector offshore na Aruba den desbentaha mas grandi ainda.
Gobierno di Aruba tabata anticipa cu e situacion di e AVV no lo a bay keda manera cu e tabata y a crea un modelo nobo cu tabatin un serie di mehoracion y extra exigencia aden caba, cu a bira e “Vennootschap met Beperkte Aansprakelijkheid” (VBA) cu a mira luz na inicio di 2009. Tur esaki no a yuda pa mehora popularidad pa haci negoshi offshore via Aruba y realmente e VBA a bira un tipo di empresa cu ta mas tanto popular pa haci negoshi na Aruba mes. E ta mas barata pa lanta na notario y su structura ta duna mas opcion den maneho. Pero e sector offshore a keda bay atras te cu na e momentonan aki no tin mucho mas cu mil compania AVV cu ta formalmente registra ainda como operacional. Practicamente no ta lanta compania offshore mas y por conclui cu Aruba su sector financiero offshore ta morto caba.
Conclusion ta cu, anticipando mas medida di e paisnan grandi contra e paisnan cu ainda ta sirbi como ‘paraiso pa impuesto’, como consecuencia di e Panama Papers, cu lo tin hasta menos base pa sikiera pensa den renacemento di e sector aki na Aruba.
E consecuencia directo di e revelacion di documento grandi aki por ta pa e empresa o persona individual na Aruba cu por ta involucra cu un compania offshore na Panama. Of ta involucra cu un compania offshore na otro teritorio, cu ta envolvi cu negoshi offshore na Panama. Na momento cu nomber aparece den publicidad di algun compania, lo no ta corecto pa ‘jump to conclusions’ pensando cu e persona o empresa lo tabata involucra den cosnan ilicito. Loke si ta importante cu esun cu aparece, por duna un splicacion di su operacion den tal pais. Si ta trata di caso di evadi impuesto (‘ontduiking’; ilegal) of evita impuesto (‘ontwijking’; legal) ta na Servicio di Impuesto pa averigua.
