Aruba ta menciona den un escandalo financiero internacional atrobe. E biaha aki den Panama Papers, basa riba un lek di informacion di e compania Panameño, Mossack Fonseca.
E compania di abogado ta duna servicio financiero y huridico, maneha placa di entre otro (ex-) presidente di paisnan, hende famoso, futbolista pero aparentemente tambe criminal. Nan ta specialisa den administracion y maneho di compania di off shore. Pero awor ta resulta tambe nan tabata yuda nan clientenan di paga menos of scapa di paga impuesto. Y tambe yuda sconde otro negoshi ilegal, manera labamento di placa di droga.
Aña pasa e lek di documento (Swiss Leaks) di e banco mas grandi na Suisa, esta HSBC, a divulga informacion di clientenan conecta cu Aruba. E banco aki tabata yuda su clientenan pa sconde placa y asina preveni pa su clientenan paga impuesto na nan pais natal.
Awor Panama Papers tin 27 compania conecta cu Aruba riba e lista dudoso, y tambe 3 cliente y 30 accionista. Pero te ainda no ta conoci si nan ta involvi den cosnan ilegal. Mescos cu a pasa despues e otro dos escandalo financiero, Panama Papers a lanta un ola di investigacion den e resto di mundo. Autoridadnan di Merca, Francia, Australia y tambe Hulanda entre otro a cuminsa investiga clientenan di Mossack Fonseca.
Investigacion na Aruba
Bon Dia Aruba a purba di wak si autoridadnan local tambe a tuma nota di e Panama Papers y e conexion cu Aruba. Pero te ainda no a logra di haya informacion. Ministerio Publico (OM) si ta na haltura pa basta tempo caba cu Panama ta un pais unda bo por lanta un compania facilmente pa haci cos ilegal. E fuente Hulandes Vrij Nederland a publica un articulo dialuna unda ta menciona fiscal Bart Schmitz di OM Aruba.
El a remarca den un entrevista cu e fuente Hulandes ya na 2014: “Si bo kier laba placa, miho lanta di biaha un NV Panameño.” E fiscal tabata purba di haya informacion den un caso di labamento di placa di e compania Arrowplus Holding SA. E persona encarga tabata keda na Panama y segun fiscal Schmitz e ta hopi dificil pa haya cooperacion di e pais pa casonan asina.
