E social democrata Laurentino Cortizo a gana diadomingo pasa eleccion presidencial di Panama, cu un bentaha estrecho di dos punto riba e derechista Rómulo Roux, cu tabatin apoyo di e detenido ex mandatario, Ricardo Martinelli.
A anuncio a ser haci pa e presidente di Tribunal Electoral, Heriberto Araúz, a traves di un yamada via telefon transmiti pa medionan di comunicacion. Araúz a bisa Cortizo cu tabata yam’e pa anuncia cu e tabata e ‘triunfado virtual pa e cargo di presidente di Republica pa e periodo 2019-2024’.
“Cu humildad mi a ricibi e anuncio, un anuncio cu ta mas importante pa e pais, un anuncio cu hopi responsabilidad ora mi ta prepara cu un ekipo pa asumi e rienda di e pais desde dia 1 di juli di e aña aki”, Cortizo a responde.
Cu mas di 95% di mesa conta, Cortizo a obtene 33% di e voto, sigui pa Roux cu 31%. Ambos tabata opositor di Varela, cu ta caba su periodo golpia pa e caida economico y e scandal di corupcion, y ken no a ser presenta como candidato pa motibo cu Panama no ta permiti e inmediato reeleccion.
Na di tres luga a aparece, cu 19,7% di e voto, e candidato independiente Ricardo Lombana, ken a reconoce su derota.
Tambe e futuro presidente a sigura cu un di su principal compromiso lo ta ‘rescata e nomber’ di su pais, cu a ser vincula cu e scandal di ‘Panama Papers’ y e inclusion riba e lista di paraiso fiscal.
“Esaki ta un pais cu a haci hopi esfuerso pa cumpli cu e norma internacional”, el a bisa.
