(EFE) – Hende Muhe cu ta crusa tapon di Darien, e peligroso selva cu ta sirbi di frontera entre Colombia y Panama cu cada aña ta ricibi miles di migrante, ta sufri di violencia sexual “sistematico” durante e trayecto, incluso a reporta violacionnan den grupo, cu ta keda impune.
Asina a indica Centro di Husticia y Derecho Internacional (Cejil), debi na un bishita diahuebs ultimo na stacion di recepcion migratorio (ERM) estableci pa Estado Panameño na provincia di Darien.
“Cada biaha ta mas hende muhe y muchanan” esunnan cu ta atravesa Darien, y “e principal consecuencia ta aumento di violencia sexual cu nan ta sufri durante e transito” e director di Cejil pa Centro America y Mexico, Claudia Paz y Paz a sigura.
E organisacion no gubernamental (NGO) aki a señala cifranan di Servicio Nacional di Migracion (SNM) di Panama segun e cual entre januari y februari ultimo a drenta via frontera di Colombia 4.442 y 4.014 persona, den e dos luna aki, un “record compara cu e mesun periodo di 2021, tempo cu apenas 1.000 persona a pasa.
“E situacion aki ta hopi alarmante” Paz y Paz a adverti.
E fluho migratorio a aumenta for di mei 2021, un aña cu a cera cu e cifra di mas di 130.000 persona cu a drenta via frontera cu Colombia den nan caminda pa Nort. Mayoria di famia ta Haitiano, aunke tambe tin Cubano y cu un cifra menor e Venezolanonan y otro ciudadanonan di paisnan di henter mundo.
Despues di e bishita na Darien, Paz y Paz a detaya cu na e momentonan aki mayoria migrantenan cu ta yegando na Darien ta di nacionalidad Venezolano y cu despues di un inspeccion, por a destaca cu Panama a avansa pa sigura derechonan di personanan den mobilidad, aunke ainda tin “temanan pendiente”.
